Vilja herða smitvarnir í sjókvíaeldi

Endurskoða þarf rekstrarleyfi sjókvíaeldisfyrirtækja og breyta þeim þannig að skilyrt verði í rekstrarleyfi að öll eldissvæði innan leyfis tilheyri skilgreindu smitvarnarsvæði áður en fiskur er settur út á þau.

Þetta er mat starfshóps um smitvarnir í sjókvíaeldi sem Svandís Svavarsdóttir matvælaráðherra skipaði á síðasta ári eftir að meinvirkt afbrigði ISA-veirunnar sem veldur blóðþorra herjaði á laxfiska í Reyðarfirði og Berufirði.

Frétt af mbl.is

Slátrað úr kvíabólum á Austfjörðum

Lagt er til að tekin verði upp bólusetningarskylda á laxi í sjókvíaeldi við fyrsta tækifæri eða þegar tryggt verður að nægt framboð bóluefnis sé fyrir hendi og öll útsett seiði verði bólusett fyrir blóðþorra.

Þá telur starfshópurinn að reglubundin skimun sé mikilvægur þáttur í vöktun á smitsjúkdómi af völdum ISA-veirunnar og leggur því til að skima skuli foreldra fyrir ISA-veirunni áður en hrogn eru flutt í klak- og seiðastöðvar. Auk þess er lagt til að laxaseiði sem flytja á milli starfsstöðva verði skimuð. „Einnig skulu reglubundnar sýnatökur framkvæmdar í öllum sjókvíaeldisstöðvum, einu sinni á hverjum ársfjórðungi úr hverju eldissvæði,“ segir í tillögunum.

Nánar er fjallað um tillögurnar í Morgunblaðinu.