Bóndinn sem spígsporar um hafnir landsins

Ásgeir sem er menntaður vélvirkjameistari kveðst hafa starfað í mörg ár í iðnaði og stóriðju, meðal annars unnið að byggingarverkefni í Svartfjallalandi, en einn góðan veðurdag vaknaði sú hugmynd hjá honum og Valmundi Árnasyni, sem er bóndi og rafvirkjameistari, að byrja að löggilda vogir. Úr hugmyndinni varð fyrirtækið Löggilding ehf. á Akranesi.

Fjöldi skráðra sjófara þarfnast árlega skoðun til að öðlast haffærnisskírteini. mbl.is/Alfons Finnsson

Löggilding sér hins vegar ekki bara um vogir. Fyrirtækið fékk nýverið leyfi Samgöngustofu til að annast skoðun skipa, en slík skoðun þarf að fara fram til að sjóför öðlist haffærnisskírteini.

„Við ákváðum bara að stíga skrefið og þetta féll bara mjög vel að því sem við vorum þegar að gera. Þessi bransi gengur mjög mikið út á það að fyrirtæki sé með öflugt og vel uppsett gæðakerfi, því þetta snýst allt um að fara rétt og vel að þeim reglum sem settar eru. Í góðu samstarfi við Samgöngustofu tókst okkur að kortleggja hvaða skilyrði við þurftum að uppfylla og vorum á mettíma komnir með leyfi til að skoða skip, um miðjan desember,“ útskýrir Ásgeir.

Spurður hvort eigendur skipa taki því illa að fá athugasemdir skoðunarmanna, svarar Ásgeir því neitandi. „Mér til mikillar ánægju skilja langflestir að þessi skipaskoðun snýst fyrst og fremst um öryggismál. Það þarf ekkert að kenna sjómönnum að veiða fisk – þeir kunna það mætavel – en þetta er til þess gert að tryggja að þeir komi heilir heim.“

Viðtalið við Ásgeir má lesa í síðasta blaði 200 mílna.