Óteljandi tækifæri með ofurrófstækni

„Mannsaugað og myndavélar nema bara mjög lítinn hluta af geislasviðinu,“ útskýrir Konráð Hatlemark Olavsson, framkvæmdastjóri Maritech á Íslandi. Hann bendir á að innan sjávarútvegs og fiskeldis sé þegar verið að nota röntgengeisla til að greina beingarða, en með ofurrófstækninni er hægt að greina mun fleiri hluti.

Ofurrófstæknin býður upp á fjölda tækifæra í gæðaeftirliti í sjávarútvegi, sem og tækifæri á sviði tegunda- og stærðargreiningu afla. Ljósmynd/Maritech

„Í hvítfisknum erum við að leita til dæmis að ormum og blóði. Við sjáum í gegnum roðið á hvítfiski, þannig að ef þú myndar heilan fisk geturðu séð mar eða hvort hann hafi verið illa blóðgaður til dæmis.“

Spurður hvort fiskurinn þurfi að vera eitthvað verkaður til að hægt sé að nýta Maritech Eye í hefðbundinni íslenskri fiskvinnslu, svarar Konráð því neitandi. „Við getum skannað hann í hvaða formi sem er, þess vegna heilan. Tækið getur greint allt sem það kann að greina og það finnur það sem við erum að leita að hverju sinni. Með gervigreind getum við kennt tækinu að þekkja mismunandi hluti.“

Lesa má nánar um tæknina í viðtali við Konráð í síðustu útgáfu 200 mílna.