Norskir bræður skipstjórar á hafnfirskum tvíburum

Bræðurnir Tom-Kenneth og Kurth-Anders Slettvoll útgerðarmenn frá Kabelvåg í Lofoten fengu fyrir skömmu afhenta tvo nýja Cleopatra 33 báta frá Bátasmiðjunni Trefjum í Hafnarfirði, að því er fram kemur í tilkynningu frá fyrirtækinu.

Þar segir að um sé að ræða tvíburabáta sem munu bera nöfnin Ørsvåg II og Ørsvåg III og leysa þeir af hólmi eldri bát , en bræðurnir norsku verða skipstjórar um borð í sitt hvorum bátnum.

Bátarnir eru búnir undir línuveiðar og eru 9.99 metrar á lengd, mælast 10 brúttótonn og tekur lest tólf 380 lítra fiskikör. Þá er um borð borðsalur fyrir fjóra í brú og eldunaraðstaða í lúkar. Svefnpláss er er fyrir þrjá og salerni með sturtu.

Nýir Cleopatra 33 bátar voru afgreiddir til Noregs. LJósmynd/Trefjar

Útbúnaður bátanna er nákvæmlega eins, enda tvíburar, og er um borð aðalvél er af gerðinni FPT C90 410hö tengd ZF286IV gír. Vökvadrifnar hliðarskrúfur eru að framan og aftan sem tengdar eru sjálfstýringu bátsins. Siglingatækin eru af gerðinni Furuno, Olex og Simrad.

Lífbátur og annar öryggisbúnaður bátsins kemur frá Viking.

Bátarnir eru komnir til Noregs og er gert ráð fyrir að þeir hefji veiðar á næstu dögum.

LJósmynd/Trefjar

• Blogga um frétt