Segir vafa geta verið um skilgreiningu lögsögunnar

Íslensk yfirvöld virðast ekki hafa afhent fullnægjandi upplýsingar um hafsvæðið sem Ísland telur eigin efnahagslögsögu í samræmi við ákvæði hafréttarsamnings Sameinuðu þjóðanna. Aðeins virðist hafa verið afhent þýðing á upphaflegum lögum um íslensk hafsvæði frá 1979, en engar uppfærslur í tengslum við þær breytingar sem hafa átt sér stað frá þeim tíma.

Bjarni Már Magnússon, prófessor við lagadeild Háskólans á Bifröst, vekur athygli á þessu í aðsendri grein í Morgunblaðinu í dag og bendir hann á að það getur haft lagalegar afleiðingar að skila ekki inn fullnægjandi gögnum.

Vísar hann til dóms Alþjóðadómstólsins í Haag í máli Níkaragva og Kólumbíu frá í apríl á síðasta ári þar sem vafi var sagður ríkja um staðsetningu grunnlínu Níkaragva, að hún væri óákveðin (e. unsettled), í ljósi þess að ríkið hafi ekki skilað upplýsingum um hana til aðalframkvæmdastjóra Sameinuðu þjóðanna.

„Hvort sem mistök hafa átt sér stað við birtingu umræddra upplýsinga, um misskilning er að ræða eða íslensk stjórnvöld hafa vísvitandi ákveðið að hunsa umrædda skyldu þá verður að spyrja hvort ekki sé æskilegt að sem minnstur vafi ríki um víðáttu íslenskra hafsvæða,“ skrifar Bjarni Már í grein sinni.

Greinina má lesa í heild sinni í Morgunblaðinu í dag.