Norska stórflutningaskipið, Wilson Skaw, strandaði við Ennishöfða á Húnaflóa í dag. Skipið var á leið frá Hvammstanga til Hólmavíkur þegar það strandaði, samkvæmt tilkynningu frá Landhelgisgæslunni. Skipið er um 4.000 brúttótonn að þyngd og um 113 metra langt.

Skipstjórinn tilkynnti Landhelgisgæslunni um strandið á þriðja tímanum. Varðskipið Freyja, sem statt var í Skagafirði, var kallað út sem og áhöfn þyrlu Landhelgisgæslunnar. Þá var björgunarskip Slysavarnafélagsins Landsbjargar á Skagaströnd sömuleiðis beðið um að halda á vettvang, eins og segir í tilkynningunni.

Staðsetning Wilson Skaw á strandstað samkvæmt Marine traffic heimasíðunni. Kort/Marine traffic

Aðstæður góðar og veður með besta móti

Samkvæmt skipstjóra flutningaskipsins er líðan áhafnarinnar góð, aðstæður á strandstað góðar og veður með besta móti.

Gert er ráð fyrir að varðskipið Freyja verði komið á strandstað um kvöldmatarleytið en þá verða næstu skref metin. Von er á þyrlu Landhelgisgæslunnar á staðinn eftir rúma klukkustund.

Landhelgisgæslan hefur gert Umhverfisstofnun viðvart um strandið.

Á slæmum stað að mati heimamanns

Torfi Halldórsson, bóndi á Broddadalsá, bæ í næsta nágrenni við strandstaðinn, segir í samtali við mbl.is að það líti út fyrir að um slæman stað fyrir strand sé að ræða. Hann var sjálfur ekki á staðnum þegar mbl.is náði á hann, en hafði fengið upplýsingar um hvar utan Ennishöfða skipið væri. Segir hann staðsetninguna mjög slæma. Skipið sé nú fyrir miðjum Húnaflóa og ef það geri norðanátt verði erfitt að bjarga því. Þá sé þarna aðeins grjótharður botn, klappir og sker en ekki sandur.

Uppfært klukkan 22.50:

Í fréttaflutningi af málinu í dag var stórflutningaskipið, Wilson Skaw, fyrir misskilning sagt vera áburðarflutningaskip. Hið rétta er að skipið er stórflutningaskip sem í þessari siglingu var að flytja salt á milli hafna. Það hefur nú verið leiðrétt.

Gert er ráð fyrir að varðskipið Freyja verði komið á strandstað um kvöldmatarleytið. mbl.is/Hafþór Hreiðarsson

Tengdar fréttir

Wilson Skaw strandar á Húnaflóa

Hvorki reglur um leiðsögn né leiðsögumannalisti

• Skipstjóri neitaði áhöfn um áfallahjálp
• Hinstu för Wilson lokið
• Wilson Odra lýkur við túrinn fyrir Wilson Skaw
• Sérfræðingar væntanlegir til landsins

» Fleiri tengdar fréttir

• Blogga um frétt