Makrílveiðimenn biðu lægri hlut í Hæstarétti

Hæstiréttur Íslands hefur komist að þeirri niðurstöðu að Héraðsdómi Reykjavíkur hafi borið að vísa frá aðalkröfu Félags makrílveiðimanna, í máli gegn íslenska ríkinu, um að ógilda kvótasetningu makríls árið 2019. En staðfestir sýknu íslenska ríkisins vegna varakröfu makrílveiðimanna.

Þetta kemur fram í niðurstöðu dómsins sem birtur var á miðvikudag á vef Hæstaréttar.

Frétt af mbl.is

Félag makrílveiðimanna stefnir íslenska ríkinu

Félag makrílveiðimanna vildu meina að Alþingi hefði verið óheimilt að takmarka stjórnarskrárvarinn rétt félagsmanna hans til aflahlutdeildar í makríl með fyrirmælum um að úthluta skuli einstökum skipum aflahlutdeild í makríl á grundvelli tíu bestu aflareynsluára skipanna á árunum 2008 til 2018.

Hæstiréttur telur að aðalkrafan feli í sér lögspurningu sem fullnægir ekki áskilnaði laga og er því ekki uppfyllt það skilyrði að skorið sé úr um tilvist eða efni réttinda.

Með frávísuninni er hins vegar „engu slegið föstu um að fyrirkomulag um veiðireynslu í makríl samkvæmt lögum nr. 46/2019 hafi ekki haft sérstakar afleiðingar fyrir einhverja í hópi félagsmanna umfram aðra eða leitt til fjárhagslegs tjóns þeirra. Geta einstakir félagsmenn, sem telja svo ástatt um sig, eftir sem áður leitað úrlausnar um þau réttindi sín fyrir dómstólum.“

Staðfesti sýknu vegna varakröfu

Félag makrílveiðimanna lögðu einnig fram varakröfu sem krafðist ógildingar kvótasetningarinnar á grundvelli þess að við úthlutun hafi verið sett skilyrði sem snéru að veiðarfærum og hafi þannig mismunað félagsmönnum sem stunda veiðar á minni bátum.

Hæstiréttur komst að þeirri niðurstöðu að það „búa hlutlægar og málefnalegar ástæður að baki þeim greinarmun sem gerður er á skipum eftir veiðarfærum í þessu sambandi og ekki er gengið of langt í mismunun gagnvart skipum félagsmanna áfrýjanda til að ná því markmiði svo að í bága fari við 65. gr. stjórnarskrárinnar, sbr. 75. gr. og 72. gr. hennar um stöðu og vernd atvinnuréttinda. Þá eru ekki efni til þess eins og málatilbúnaði áfrýjanda er háttað að gera neinn greinarmun í þessu sambandi á banni við framsali aflahlutadeildar og takmörkunum á framsali aflamarks.“

Var því íslenska ríkið sýknað af varakröfu makrílveiðimanna.

Frétt af mbl.is

Íslenska ríkið sýknað af kröfum makrílveiðimanna

• Blogga um frétt