45 íslensk fyrirtæki sýna í Barselóna

Alþjóðlega sjávarútvegssýningin í Barselóna á Spáni hófst við hátíðlega athöfn í dag klukkan tíu að staðartíma. Um er að ræða stærstu sýningu greinarinnar á heimsvísu og eru þar fulltrúar fjölda íslenskra fyrirtækja.

Þetta mun vera í 29. skipti sem sýningin er haldin og annað sinn sem hún er í Barselóna, en þangað flutti sýningin frá Brussel í Belgíu. Alls verða 2.078 fyrirtæki frá 87 ríkjum með bása á sýningunni auk þess sem eru 68 þjóðarskálar. Sýningin er sú stærsta sem haldin hefur verið til þessa og leggur undir sig 49.339 fermetra í sýningarhöllinni Fira de Barcelona.

Gríðarlegt úrval er af tækjum og tólum til sýnis í Fira de Barcelona. Ljósmynd/Seafood Processing Global

Sýningin er tvískipt og snýr annars vegar að sjávarafurðum (Seafood Expo Global) og hins vegar að þjónustu við sjávarútveginn svo sem vinnslutæki og flutninga (Seafood Processing Global). Alls verða 45 íslensk fyrirtæki með bása á sýningunni, þar af 25 á sýningu framleiðenda sjávarafurða og 20 á sýningu þjónustufyrirtækja.

• Blogga um frétt