„Þetta er bara það skelfilegasta sem getur gerst. Það er ekki hægt að segja neitt annað,“ segir Sigvaldi Hólmgrímsson, skipstjóri Grímsnes GK-555, í samtali við mbl.is. Eldur kom upp í skipinu í Njarðvíkurhöfn í nótt og lést einn skipverjanna. 

Sigvaldi staðfestir að hinn látni sé karlmaður á fimmtugsaldri frá Póllandi. Hann láti eftir sig eiginkonu og börn í Póllandi.

Hann bíður nú eftir að fá að vita um örlög annars skipverja sem haldið hefur verið sofandi á sjúkrahúsi. Sá þriðji brann illa í eldsvoðanum. „Það átti að skoða í honum lungun núna um tíuleytið og ég er að bíða eftir fréttum af því,“ segir Sigvaldi. 

Sjö voru um borð

Sjö menn voru um borð þegar eldurinn kom upp en skipið átti að sigla út um klukkan fjögur í nótt. Tilkynning barst um brunann klukkan tíu mínútur yfir tvö í nótt og segist Sigvaldi ekki hafa verið vaknaður þá. Fjórir komust af sjálfsdáðum út úr brennandi skipinu.

Hann kveðst ekkert vita á þessari stundu hvað olli brunanum og bíður þess að lögregla rannsaki hvað gerðist. 

Ekki er langt síðan Grímsnes GK-555 komst í fréttir en þá vegna þess að einn skipsverji smyglaði ungri stúlku um borð. Var skipinu snúið aftur til hafnar og hann handtekinn en látinn laus að yfirheyrslu lokinni. Hann vinnur ekki lengur hjá útgerðinni.