Þór bjargaði vélarvana smábát

Áhöfn Þórs, björgunarskips Slysavarnafélagsins Landsbjargar í Vestmannaeyjum, var boðuð út í morgun til þess að sækja smábát við Kötlutanga. Smábáturinn varð vélarvana við Kötlutanga rétt undan Vík í Mýrdal og rak undan hægum vindi. Þetta kemur fram í tilkynningu frá Landsbjörg.

Björgunarsveitin var boðuð út kl. 11 í morgun og tók um eina og hálfa klukkustund að mæta á vettvang. Dráttartaug var komið frá Þór í bátinn og síðan siglt til Vestmannaeyjahafnar.

Áætluð koma við höfnina er núna síðdegis eða undir kvöld en Þór dregur bátinn á um tíu mílna hraða. Að því er segir í tilkynningunni er ekki ráðlegt að reyna frekar á dráttarpolla smábátsins, jafnvel þó að Þór hafi afl til að draga bátinn hraðar.

Einn maður er um borð í smábátnum. Ekki er víst hvort hann hafi verið að strandveiðum eða að flytja bátinn á milli staða.

Þór, sem er eitt nýrra björgunarskipa Slysavarnafélagsins, var fljótur á vettvang, með ganghraða hátt í 30 sjómílur. Það hamlaði heldur ekki för Þórs að sjólag var gott.