Kristján Loftsson, forstjóri Hvals hf., gagnrýnir Matvælastofnun (MAST) fyrir að draga upp eins dökka mynd og hægt er af hvalveiðum fyrirtækisins. Í Morgunblaðinu í dag segir hann að með framsetningu stofnunarinnar sé verið að sverta sjómenn sem starfa við hvalveiðar.

Hann segir engan leika sér að því að draga dauða dýranna á langinn og að starfsmenn bátanna reyni í lengstu lög að bana dýrunum eins hratt og auðið er.

Hann gagnrýnir nýja eftirlits­skýrslu MAST fyrir að vera augljóslega litaða af andstöðu við hvalveiðar og þekkingarleysi eftirlitsaðila Fiskistofu, en athuganir hennar lágu til grundvallar skýrslunni.

mbl.is/Eggert Jóhannesson

Samkvæmt skýrslunni, sem fjallar um veiðar á síðasta ári, telur stofnunin að aflífun á hluta stórhvela hafi tekið of langan tíma og ekki samræmst meginmarkmiðum laga um velferð dýra.

Þórdís Kolbrún Reykfjörð Gylfadóttir utanríkisráðherra segir skýrsluna dapurlega og að af henni hljótist neikvæð athygli erlendis. Hún segir ábyrgðina á velferð dýranna liggja hjá þeim sem stunda hvalveiðar.

MAST krafði Hval hf. um rúmlega 6 milljónir króna fyrir eftirlit með starfsháttum um borð í hvalbátum. Kristján segir lagaforsendu fyrir reikningnum úr lausu lofti gripna þar sem slík lög eigi ekki við um villt dýr og fiska.

Hvalur hf. höfðaði mál gegn MAST vegna kröfunnar og óskaði stofnunin ítrekað eftir því að fresta fyrirtöku málsins. Að lokum lýsti hún því yfir að reikningurinn yrði endurgreiddur.

Nánar er rætt við Kristján í Morgunblaðinu.

Tengdar fréttir

Hvalveiðar

Meirihluti óánægður með ákvörðun Bjarna

• Lög um hvalveiðar úrelt og krefjast endurskoðunar
• Hrefnuveiðar hefjast á Ísafirði í vor
• Gagnrýna ákvarðanir starfsstjórnar
• Segir næstu stjórn sitja uppi með ákvörðun Bjarna

» Fleiri tengdar fréttir