Mokveiði í færeysku lögsögunni

Mokveiði hef­ur verið á kol­munnamiðunum í fær­eysku lög­sög­unni, að sögn Hjörv­ars Hjálm­ars­son­ar, skip­stjóra á Berki NK. Skipið er á leið til Seyðis­fjarðar með 3.200 tonn, en upp­sjáv­ar­skip­in landa nú kol­munna hvert af öðru og kom Há­kon EA til hafn­ar í Nes­kaupstað í morg­un með rúm 1.600 tonn og er Barði NK leiðinni þangað með 2.000 tonn.

„Veiðiferðin gekk vel. Afl­inn fékkst í sex hol­um og var það stærsta 650 tonn. Það var ekki lengi dregið eða allt niður í fimm tíma. Í sann­leika sagt var mokveiði eins og oft hef­ur verið að und­an­förnu. Það er ekki hægt að kvarta þegar skip­in eru að fá yfir 1.000 tonn á sól­ar­hring. Staðreynd­in er sú að það er miklu meiri kol­munni á ferðinni en verið hef­ur und­an­far­in ár,“ seg­ir Hjörv­ar í færslu á vef Síld­ar­vinnsl­unn­ar.

„Að þessu sinni vor­um við að veiða í Ræs­inu vest­an við Fær­eyj­ar og við fyllt­um áður en fisk­ur­inn gekk inn í lokað hólf. Þegar fisk­ur­inn gekk inn í hólfið færðu skip­in sig aust­ur fyr­ir eyj­arn­ar en það voru afla­frétt­ir þaðan. Nú er farið að síga á seinni hluta vertíðar­inn­ar en það verður spenn­andi að fylgj­ast með hvort kol­munn­inn geng­ur ekki í veru­leg­um mæli inn í ís­lenska lög­sögu. Ef á að veiða hann í ís­lenskri lög­sögu þarf ein­hver kvóti að vera eft­ir en fisk­ur­inn verður feit­ari og betri þegar hann veiðist þar. Menn hljóta að vera afar ánægðir með kol­munna­veiðina að und­an­förnu, skip­in hafa fiskað vel og veður hef­ur verið afar gott. Það er ekki und­an mörgu að kvarta,“ seg­ir Hjörv­ar.

Íslensku upp­sjáv­ar­skip­in hafa landað ríf­lega 190 þúsund tonn­um af kol­munna á vertíðinni sam­kvæmt afla­stöðulista Fiski­stofu. Enn er eft­ir rúm­lega 80 þúsund tonna kol­munna­kvóti.

• Blogga um frétt