Allt að 24.000 tonna laxeldi í Ölfusi

Skipulagsstofnun hefur gefið út álit sem staðfestir umhverfismatsskýrslu GeoSalmo sem fjallar um áætlanir fyrirtækisins um að reisa allt að 24.000 tonna laxeldisstöð vestan við Þorlákshöfn. Vinna við umhverfismat hefur staðið yfir í um tvö ár.

Í tilkynningu frá GeoSalmo segir að fyrirtækið leggi áherslu á ábyrga nýtingu auðlinda, sjálfbærni og hringrásarhagkerfið. Auk þess leggi það áherslu á lágmörkun umhverfisáhrifa og ábyrga nýtingu auðlinda, sér í lagi vatnsauðlindar. Álitið staðfesti fyrirhugaðar aðgerðir GeoSalmo í þeim efnum.

GeoSalmo áætlar að reisa eldisstöð sem getur framleitt allt að 7.500 tonn af laxi á ári. Fyrirtækið hefur þegar samið við norska fyrirtækið Artec Aqua um hönnun og uppbyggingu stöðvarinnar.

Jens Þórðarson, framkvæmdastjóri GeoSalmo, segir í tilkynningunni að það sé fagnaðarefni að fá álit Skipulagsstofnunar sem staðfesti þá vinnu sem liggur að baki umhverfismatinu.

„Þetta markar lok tveggja ára verkefnis og er stærsti einstaki áfanginn í undirbúningi félagsins fyrir uppbyggingu sína. Með þessari niðurstöðu styttist í að félagið geti hafið framkvæmdir og opnast þannig nýr kafli í sögu félagsins,“ er haft eftir honum í tilkynningunni.

• Blogga um frétt