Kolmunnaaflinn 35% meiri í apríl

Afli íslenskra fiskiskipa í apríl síðastliðnum var rúmlega 126 þúsund tonn sem er 11% meiri afli en í apríl 2022. Skýrist það fyrst og fremst vegna mikillar aukninar í kolmunnaafla uppsjávarskipanna en hann var rúmlega 88 þúsund tonn í apríl sem er 35% meira en í sama mánuði í fyrra.

Þetta má lesa úr tölum Hagstofu Íslands.

Þá var botnfiskaflinn tæplega 35 þúsund tonn og dróst saman um 24%. Af botnfisktegundum var þorskaflinn tæp 18 þúsund tonn sem er 24% minna en í sama mánuði árið á undan. Mesti samdrátturinn var hins vegar í ufsa en aflinn minnkaði um 66%. Ýsuaflinn jókst hins vegar um 22%.

Afli á tólf mánaða tímabilinu maí 2022 til apríl 2023 var 1.382 þúsund tonn sem er 7% minna en landaður afli tólf mánuði á undan.

• Blogga um frétt