Myndskeið: Báturinn alelda á svipstundu

Eldur kom upp í bátnum Ronju SH 53 í Stykkishólmi í gærkvöldi. Einn var um borð þegar eldsins varð vart og náði hann að koma sér um borð í gúmmíbát áður en eldurinn gleypti bátinn. 

Báturinn er trefjaplastbátur sem aðallega er notaður til bláskeljaræktunar og varð hann alelda á svipstundu. Var hann skammt frá landi þegar eldsins varð vart að sögn Einars Þórs Strand, slökkviliðsstjóra í Stykkishólmi og svæðisstjóra hjá Slysavarnafélaginu Landsbjörg. 

Frétt af mbl.is

Máttlaus ferðamaður, kaldir göngumenn og eldur

Ronja SH 53 varð alelda á svipstundu.

„Við gerðum ekkert. Við sáum þegar við komum á svæðið að engu yrðu bjargað. Við gæslan tókum þá ákvörðun í sameiningu að best yrði að láta þetta hafa sinn gang. Að auki var erfitt að komast að þessu. Menn hefðu þurft að vaða upp að mitti og enn verra var að fara sjóleiðina,“ segir Einar.   

Bátnum hvolfdi um klukkan eitt í nótt að sögn Einars og slokknaði eldurinn við það. Sem stendur sést brakið ekki en gera menn ráð fyrir því að báturinn muni sjást aftur um þrjúleytið í dag þegar fjarar að nýju. Verkefni tryggingarfélags og Umhverfisstofnunar er að fjarlægja flakið. 

Báturinn var 50-100 metra frá landi og manninum tókst að koma sér í gúmmíbát.

Engin olíubrák 

„Ég fór að skoða þetta í morgun og ekki var hægt að sjá neina olíubrák frá bátnum. Ég hugsa að nær allt eldsneytið hafi brunnið. Ef við hefðum gert eitthvað hefði líklega meiri olía farið í sjóinn og við mátum það þannig að minnsti skaðinn myndi verða með því að gera ekkert.“

Að sögn Einars var sjómanninum brugðið en hann sakaði ekki að öðru leyti. Sat hann í gúmmíbátnum í 15-20 mínútur áður en honum var bjargað af björgunarsveit.

Báturinn féll yfir um 1 leytið í nótt.

• Blogga um frétt