Niðurstöður MAST um hvalveiðar sláandi
Setja bókamerki
Stefán Vagn Stefánsson, formaður atvinnuveganefndar Alþingis, segir niðurstöður nýrrar eftirlitsskýrslu Matvælastofnunar um hvalveiðar á Íslandi vera sláandi. Atvinnuveganefnd lítur málið alvarlegum augum.
Fram kemur í skýrslu Matvælastofnunar að hvalveiðar við Íslandsstrendur samræmast ekki markmiðum laga um dýravelferð. Málið var til umræðu á nefndarfundi atvinnuveganefndar í gær og var Svandís Svavarsdóttir gestur fundarins.
Stefán segir í samtali við mbl.is að fundurinn í gær hafi verið gagnlegur og atvinnuveganefnd muni fylgjast náið með þróun mála. „Ég held að flestir, ef ekki allir, nefndarmenn hafi áhyggjur af þessari stöðu.“
Óvissa ríkir nú um framtíð hvalveiða á Íslandi og ekki hefur verið tekin ákvörðun um að gefa út ný hvalveiðileyfi fyrir næsta ár.
Stefán segist ekki geta tjáð sig um næstu skref að svo stöddu. Boltinn sé hjá matvælaráðherra sem kallað hefur eftir frekari gögnum um hvalveiðar á Íslandi, m.a. mat á efnahagslegum áhrifum ef veiðunum verður hætt. Þá eru einnig til skoðunar áhrif hvalveiða á loftslagið sem og á vistkerfi landsins og ferðaþjónustuna.
Stefán segist vænta þess að málið verði kynnt fyrir atvinnuveganefnd þegar frekari upplýsingar liggja fyrir.
Búist þið allt eins við því að hætt verði við hvalveiðar?
„Það er ein sviðsmyndin sem búið er að teikna upp. Hvort hún verði að veruleika vitum við ekki. En það er ótímabært að tala um að hætta við hvalveiðar þar til ákvörðun um það hefur verið tekin.“
„Hins vegar getum við ekki litið framhjá niðurstöðu skýrslunnar. Hún er mjög sláandi,“ bætir Stefán við.
Hætta vegna jarðfalls í sprungur metin töluverð
Fjarskiptatæki um alla borg sprungu samtímis
740 milljón króna sígarettusmygl
Of margir nemendur og ákall um hæft starfsfólk
Tveir í haldi grunaðir um mansal og smygl á fólki
Björninn sagður nálægt byggð
Óvenjuleg tilkynning: 19 í gæsluvarðhaldi
Lögreglan leitar eftir myndefni í tengslum við andlátið