Fiskistofa ekki enn bætt úr vanköntum frá 2018

Matvælaráðuneytið og Fiskistofa hafa ekki brugðist með viðunandi hætti við úrbótatillögum Ríkisendurskoðunar frá árinu 2018 í sambandi við eftirlit stofnananna með vigtun sjávarafla, brottkasti og samþjöppun aflaheimilda.

Ríkisendurskoðun ítrekar því í heild sinni eða að hluta tíu af ellefu úrbótatillögum sem stofnunin lagði fram í skýrslu árið 2018.

Þetta kemur fram í nýrri eftirfylgniúttekt Ríkisendurskoðunar sem stofnunin kynnti fyrir stjórnskipunar- og eftirlitsnefnd Alþingis fyrr í dag. 

Skorti yfirsýn um tengsl í sjávarútvegi

Þar kemur fram að nauðsynlegar úrbætur hafi ekki náð fram að ganga á síðustu fimm árum og að flestir þeir veikleikar sem Ríkisendurskoðun fjallaði um á sínum tíma séu enn til staðar.

„Eftirlit Fiskistofu með vigtun afla og brottkasti er enn takmarkað og vísbendingar eru um að umfang brottkasts hafi verið vanmetið. Fiskistofa hefur ekki tekið upp verklag sem tryggir að yfirráð tengdra aðila yfir aflahlutdeildum séu könnuð með markvissum og reglubundnum hætti,“ stendur í tilkynningu frá Ríkisendurskoðun.

Að auki er tekið fram að Fiskistofu skorti greinagóða yfirsýn um bein og óbein tengsl aðila í íslenskum sjávarútvegi. 

• Blogga um frétt