„Það eru mikil vonbrigði með þorskinn. Ég taldi að við værum kannski komin með viðmiðunarstofn upp á 1.200 þúsund tonn og að við myndum horfa upp á frekari aukningu,“ svarar Örn Pálsson, framkvæmdastjóri Landssambands smábátaeigenda, inntur álits á nýútkominni ráðgjöf Hafrannsóknastofnunar fyrir fiskveiðiárið 2023/2024.

Aðeins 1% aukning varð í ráðgjöf stofnunarinnar í þorski milli ára og er lagt til að ekki verði veitt meira en 211.309 tonn af tegundinni.

Frétt af mbl.is

Leggja til hærri kvóta í ýsu, síld og gullkarfa

„Þessi 1% aukning endurspeglar ekki aflabrögðin eins og þau hafa verið á miðunum. Mönnum finnst vera miklu meira af þorski en undanfarin ár,“ segir Örn sem bendir á að þorskurinn sé sérstaklega mikilvægur stofn fyrir afkomu smábátaútgerða.

„Þegar sveiflujöfnun var komið á yrði hún til þess að draga úr mikilli minnkun milli ára, en núna virkar hún sem hemill á aukningu. Við hefðum fengið aðeins meiri úthlutun ef hún væri ekki. Þetta er hluti af aflareglu sem stjórnvöld setja og spurning hvort hún ætti að vera áfram,“ veltir hann fyrir sér og vísar til þess að þorskkvótinn hefði aukist um 2% ef ekki væri fyrir jöfnunarákvæði í aflareglu sem er notuð til grundvallar útreikninga ráðgjafar.

Frétt af mbl.is

Væntir þess að ráðgjöf í þorski hækki til muna

Ýsa í takti við aflabrögð

Aftur á móti telur hann að ráðgjöf Hafrannsóknastofnunar hafi verið í samræmi við aflabrögð þegar kemur að ýsu, en ráðgjöfin hækkar um 23% annað árið í röð og nemur hún 76.415 tonn. „Það er aukning í steinbíti sem er jákvætt, vonandi heldur hann áfram að bæta í.“

„Með ufsann hefur þetta verið upp og ofan. Það hefur gengið vel að ná honum á færi en það hefur gengið verr hjá togurunum. Það veiðist ekki allur ufsakvótinn á þessu ári,“ segir Örn. Ráðgjöf Hafrannsóknastofnunar gerir ráð fyrir 7% samdrátt í aflamarki í ufsa.

Tengdar fréttir

Hafrannsóknastofnun

Fengu fjarstýrðan kafbát

• Þorskar undir meðalþyngd fyrri ára
• Jónbjörn setti nafn sitt á nýja tegund
• Fjárfestu í nýjum rannsóknabúnaði
• Auglýsa Bjarna Sæmundsson til sölu

» Fleiri tengdar fréttir

• Blogga um frétt