American Seafoods stækkar flota sinn

Bandaríska sjávarútvegsfyrirtækið American Seafoods Group hefur fest kaup á verksmiðjutogaranum Phoenix sem gert hefur verið út af Phoenix Processor Limited Partnership í Seattle í Washington-ríki. Skipið fær nú nafnið American Empress II og er gert ráð fyrir að það hefju veiðar fyrir nýja eigendur á kolmúla í ágúst.

Skipið er talið styrkja hagkvæmni og skilvirkni veiða American Seafoods, að því er segir í tilkynnignu frá félaginu.

Frétt af mbl.is

Framleiðslan með lægsta kolefnissporið

„Það er með mikilli ánægju að American Seafoods bætir American Empress II við flota sinn,“ segir Einar Gústafsson, forstjóri American Seafoods, í tilkynnignunni.

Við stöndum á mikilvægum tímamótum í sögu American Seafoods, þar sem við stækkum á sjálfbæran og ábyrgan hátt og styrkjum leiðandi stöðu okkar í villtum alaskaufsa og kolmúla. Þessi viðbót við flota American Seafoods er nýjasta dæmið um markvissar fjárfestingar félagsins í afkastagetu og innviðum sem þjóna vaxandi hóp viðskiptavina um allan heim,“ segir hann.

Einar Gústafsson, forstjóri American Seafoods. mbl.is/Gunnlaugur Snær

Nafnið á sér sögu

Nafnið sem skipinu er gefið, American Empress II, á sér mikla sögu innan félagsins og má rekja til American Empress sem var smíðað fyrir stofnenda félagsins, Kjell Inge Rökke, árið 1988 og var þá fyrsta sinnar tegundar.

American Empress II er 84 metra að lengd, 13,42 metra að breidd og er 3.124 brúttótonn. Skipið var smíðað 1974 en hefur tekið miklum breytingum síðan. Upphaflega var skipið smíðað fyrir bresku útgerðina Theriot Offshore International, en var selt til Bandaríkjanna árið 1988.

• Blogga um frétt