Leggja niður rækjuvinnslu á Hólmavík

Ekki hefur verið greiddur út arður úr félaginu frá því Snæfell kom að rekstrinum. Tap síðasta árs var 205 milljónir króna samkvæmt ársreikningi. Eigið fé var neikvætt um 360 milljónir króna í árslok 2022 og eiginfjárhlutfall neikvætt um 28%. Helstu eignir Hólmadrangs felast í húsnæði, búnaði og birgðum.

Staðsetning vinnslunnar er á margan hátt óhagstæð þar sem flutningskostnaður á hráefni er mikill en allt hráefni sem unnið er í rækjuvinnslunni er að mestu innflutt frá norður Noregi og Kanada þar sem engar veiðiheimildir eru í félaginu. Þá er skortur á frystigeymslum á Hólmavík og því hefur þurft að geyma hluta hráefnisins í öðrum landshluta með tilheyrandi kostnaði. 

Þá er komið að endurnýjun bæði húsnæðis og tækjabúnaðar en það er mat Hólmadrangs að reksturinn standi ekki undir slíkri fjárfestingu. Leitað hefur verið annarra leiða til þess að tryggja áframhaldandi rekstur án árangurs. 

Hólmdrangur vonast til þess að aðilar sem koma að atvinnumálum Strandarbyggðar kanni möguleika á annarri starfsemi í húsnæði félagsins og mun leggja byggðinni lið við þá vinnu.