Lönduðu 102 þúsund tonnum

Afli íslenskra fiskiskipa var tæplega 102 þúsund tonn í maí síðastliðnum sem er 11% minni afli en sama mánuð á síðasta ári, að því er fram kemur á vef Hagstofu Íslands. Þetta rímar vel við samdrátt í veiðiheimildum í þorski, lakan árangur veiða á ufsa og góðar kolmunnaveiðar fyrr á árinu.

Botnfiskafli var 38 þúsund tonn í maí sem er 16% minna en á síðasta ári. Dróst hlutfallslega mest saman í ufsa en togurunum hefur gengið illa að ná tegundinni í vor. Þá varð 17% samdráttur í þorski og er það í samræmi við samdrátt í aflaheimildum undanfarin ár, en fjöldi skipa og báta hafa þegar klárað heimildir sínar.

20% aukning hefur þó orðið í ýsu sem er í samræmi við 23% aukningu í veiðiheimildum milli fiskveiðiára. Sérstaka athygli vekur að annar botnfiskafli eykst um 43%.

Meira af kolmunna á 12 mánaða tímabili

Tæplega 60 þúsund tonnum af kolmunna var landað í maí og er það 35% minna en í sama mánuði árið 2022. Vert er þó að minna á að veiðar gengu einstaklega vel fyrr í vor og hafa íslensku fiskiskipin þegar landað tæpum 222 þúsund tonnum af kolmunna á fiskveiðiárinu.

Þetta sést enn betur þegar rýnt er í aflatölur á 12 mánaða tímabili júní 2022 til maí 2023 þegar fiskiskipin lönduðu 260 þúsund tonnum af kolmunna en á 12 mánaða tímabilinu á undan lönduðu þau rúmu 201 þúsund tonni.

Á undanförnum tólf mánuðum var heildarafli íslenskra fiskiskipa 1.346 tonn sem er 11% minna en tólf mánaða tímabil á undan. Varð 9% samdráttur í botnfiskafla en 13% samdráttur í uppsjávarafla, en loðnuvertíðin síðasta var umtalsvert minni en sú á undan.

• Blogga um frétt