Lax sem Háafell elur í Ísafjarðardjúpi dafnar afar vel. Fiskurinn var settur út í kvíar í Vigurál á síðasta ári og hefst slátrun í haust. Í vor var annað kvíabólið tekið í notkun, Kofradýpi.
Háafell stendur í miklum fjárfestingum við uppbyggingu mannvirkja og tækjabúnaðar vegna eldisins, auk lífmassans. Framkvæmdir eru hafnar við stækkun seiðastöðvarinnar á Nauteyri og nýr fóðurprammi og vinnubátur til að nota á Kofradýpi koma í sumar, segir í umfjöllun Morgunblaðsins.
Háafell er dótturfélag sjávarútvegsfyrirtækisins HG á Ísafirði sem stundað hefur fiskeldi í Ísafjarðardjúpi í 22 ár. Alinn var þorskur og regnbogasilungur þar til fyrirtækið fékk fyrsta laxeldisleyfið í Djúpinu, 6.800 tonn, og hóf laxeldi vorið 2022. Annað leyfi hefur verið auglýst, 5.200 tonn, til Arctic Fish, og stendur til að setja út fyrstu seiðin þar í haust.
Falur Þorkelsson skipstjóri og Gauti Geirsson framkvæmdastjóri.
mbl.is/Helgi Bjarnason
Gauti Geirsson, framkvæmdastjóri Háafells, segir að eldið í Viguráli hafi gengið afskaplega vel. Fiskurinn hafi vaxið vel og afföll verið afar lág. Spurður um skýringar segir Gauti að starfsfólk Háafells búi að langri reynslu af fiskeldi í Djúpinu. Hann nefnir að vandað hafi verið val á staðsetningum, góð seiði séu notuð og fiskinum sinnt vel. Segir Gauti að búast megi við því að eitthvað komi upp á í eldinu en starfsfólk Háafells vilji vera við öllu búið og geta brugðist hratt við.
Ítarlega er fjallað um málið í Morgunblaðinu í dag.