Kyrrsettu Vivienne Sheri D

Gámaskipið Vivienne Sheri D var kyrrsett í Reykjavíkurhöfn af hafnarríkiseftirlitsmönnum Samgöngustofu 20. júní, að því er fram kemur í tilkynningu á vef stofnunarinnar.

Skipið hefur sinnt siglingum milli Íslands og Norður-Ameríku fyrir Eimskip.

Við skoðun komu í ljós sprungur í stáli á lúgukörmum skipsins og einnig gamlar sprunguviðgerðir sem ekki voru samþykktar af flokkunarfélagi skipsins. Skipið var því kyrrsett og flokkunarfélagi og fánaríki skipsins tilkynnt um það.

Eimskip upplýsir að skoðunarmaður frá flokkunarfélaginu kom til landsins í gærkvöldi. Eftir eina og hálfa klukkustund og minniháttar lagfæringar fékk skipið heimild til að sigla og hélt sína leið áleiðis til Bandaríkjanna í nótt.

Uppfært kl: 11:04. Fréttin hefur verið uppfærð með tilliti til upplýsinga sem bárust frá Eimskip um stöðu málsins.

• Blogga um frétt