Matvælaráðherra mætir á Akranesfund
Setja bókamerki
Svandís Svavarsdóttir matvælaráðherra hefur boðað komu sína á opinn fund Verkalýðsfélags Akraness í kvöld, að sögn Vilhjálms Birgissonar formanns félagsins.
Verkalýðsfélagið boðar fundinn til að ræða ákvörðun matvælaráðherra um stöðvun hvalveiða í sumar, en hvalveiðibannið gildir til 1. september nk. Fundurinn verður í Gamla kaupfélaginu og hefst kl. 19.30.
„Það er gríðarleg stemmning fyrir fundinum og ég á von á að þar verði fullt út úr dyrum,“ sagði Vilhjálmur í samtali við mbl.is. Svo sem fram hefur komið telur Vilhjálmur að tekjutap starfsmanna Hvals hf., sem flestir eru félagsmenn verkalýðsfélagsins, verði um 1,2 milljarðar króna vegna ákvörðunar ráðherrans og er þá ótalið tekjutap ýmissa fyrirtækja sem þjónustað hafa fyrirtækið á vertíðinni.
Vilhjálmur segir að nokkrir alþingismenn hafi einnig boðað komu sína á fundinn, „án þess þó að við hefðum óskað eftir staðfestingu á komu þeirra,“ sagði hann. Nefndi Vilhjálmur í því sambandi þingmennina Stefán Vagn Stefánsson, sem er 1. þingmaður Norðvesturkjördæmis og formaður atvinnuveganefndar Alþingis, Teit Björn Einarsson og Bergþór Ólason sem einnig eru þingmenn kjördæmisins. Þá sagði Vilhjálmur að Jón Gunnarsson, fyrrverandi dómsmálaráðherra, hefði og boðað komu sína.
Bæjarstjórnin furðar sig á vinnubrögðunum
Bæjarstjórn Akraness sendi í gær frá sér ályktun um hvalveiðibannið þar sem fram kom að bæjarstjórnin furðaði sig á vinnubrögðum matvælaráðherra í málinu. Í ályktuninni sagði m.a. að bannið hafi komið flatt upp á fjölda Akurnesinga sem gert hafi ráð fyrir atvinnu og tekjum á hvalveiðivertíð sumarsins.
„Um er að ræða skyndilegan atvinnu- og tekjumissi fyrir fjölmarga íbúa að ógleymdri afleiddri starfsemi, en fjölmörg fyrirtæki sem þjónusta hvalveiðina á einn eða annan hátt höfðu gert ráðstafanir, jafnvel ráðist í kostnað og voru klár í vertíð. Þá hefur ákvörðun ráðherra bein áhrif á útsvarstekjur Akraneskaupstaðar og þar með möguleika hans til að fjármagna þjónustu við íbúa, en bæjarstjórn áætlar að tapaðar útsvarstekjur kaupstaðarins vegna þessa hlaupi á tugum milljóna,“ sagði m.a. í ályktuninni.
Var engin kristnitaka árið 1000?
Lát hjóna í Neskaupstað: Ákæra gefin út
Bjarni: „Útilokað að þetta geti gengið upp“
Skattamál verði líklega „þeirra mesta klemma“
Víkingar komnir yfir 800 milljónir í greiðslur
„Tímabil aukinnar eldvirkni“
Alvarleg netárás á Wise
