Bjarni Benediktsson, fjármála- og efnahagsráðherra, segist ósáttur við aðdraganda hvalveiðabannsins. Þó ekki svo að hann geti sagt að ríkisstjórnarsamstarfið sé í hættu.

Lög­fræðiálit sem Sam­tök fyr­ir­tækja í sjáv­ar­út­vegi (SFS) lét vinna vegna ákvörðunar Svandísar Svavarsdóttur mat­vælaráðherra um að banna tíma­bundið veiðar á langreyðum leiddi í ljós að ákvörðunin hefði farið í bága við lög og ekki verið reist á nægj­an­lega traust­um laga­grund­velli.

Frétt af mbl.is

Bannið í bága við lög

„Ég hef ekki kynnt mér þetta lögfræðiálit. Okkar áhersla hefur verið á það að ráðherrann ætti að endurskoða þessa ákvörðun um að fresta veiðunum, í raun og veru út allt veiðitímabilið, og leita frekar leiða til þess að gefa þeim sem stunda veiðarnar kost á að koma til móts við þessi sjónarmið,“ segir Bjarni í samtali við mbl.is.

Honum finnst að ræða þurfi málið við þá sem stunda veiðarnar um tilvik þar sem dráp dýranna taki of langan tíma.

„Það skorti að mínu áliti tillit til allra þeirra sem eiga hagsmuni hér undir. Bæði sem snertir atvinnufrelsi atvinnurekandans en líka allra þeirra sem höfðu gert ráðstafanir til þess að veiðarnar gætu farið fram. Þetta skiptir máli, ekki síst í því ljósi að þetta inngrip verður daginn áður en vertíðin átti að hefjast,“ segir Bjarni.

Ósátt við aðdragandann

Hvað ef ráðherra ákveður að bannið verði ekki endurskoðað?

„Við tökum eitt skref í einu, þetta er okkar sjónarmið og við vonumst til þess að ráðherrann horfi til þess og bregðist við og við metum síðan framhaldið,“ segir Bjarni.

Er ríkisstjórnarsamstarfið í hættu?

„Nei ég ætla ekki að lýsa því þannig en við erum ekki sátt við aðdraganda þessa máls,“ segir Bjarni.

Frétt af mbl.is

Vonar að bannið verði endurskoðað í ljósi álitsins

Hvalveiðar ræddar fyrir stjórnarsáttmálann

Hann segir að meðal annars hafi verið rætt um hvalveiðar við gerð stjórnarsáttmálanns.

„Sú krafa var viðruð þar að stjórnin yrði sammála um að hvalveiðum yrði hætt. Við vorum ekki reiðubúin til þess að setja slík atriði inn í stjórnarsáttmálann,“ segir Bjarni.

„Við erum að tala um atvinnugrein sem á sér mjög langa sögu á Íslandi. Með því að nota þessi lög og þessi rök til þess að slá vertíðina af, þá finnst mér verið að stappa nærri því að stöðva veiðar sem er þá mál sem ætti frekar að ræða á þinginu.“

Frétt af mbl.is

Hart tekist á um hvalveiðibannið

Tengdar fréttir

Hvalveiðar

Meirihluti óánægður með ákvörðun Bjarna

• Lög um hvalveiðar úrelt og krefjast endurskoðunar
• Hrefnuveiðar hefjast á Ísafirði í vor
• Gagnrýna ákvarðanir starfsstjórnar
• Segir næstu stjórn sitja uppi með ákvörðun Bjarna

» Fleiri tengdar fréttir

• Blogga um frétt