„Algert gæsahúðar augnablik“

Skipverjar á ísfisktogaranum Bergi VE 44 voru á leið til heimahafnar í Vestmannaeyjum sunnudagskvöld þegar þeir urðu varir við höfrungatorfu sem veitti þeim eftirför með tilheyrandi sjónarspili. 

„Þetta var algert gæsahúðar augnablik,“ segir Hafþór Valsson, háseti um borð.

„Við vorum að horfa á Engla alheimsins í sjónvarpinu á heimstíminu og akkúrat þegar lokalag myndarinnar hljómaði, Dánarfregnir og jarðarfarir með Sigurrós, þá leit ég út um gluggann og sá sólina speglast í sjónum og hóp af höfrungum leika listir sínar. Við hoppuðum allir upp eins og litlir krakkar og drifum okkur út á dekk. Þetta var ótrúleg sjón, eiginlega alveg ólýsanleg,“ lýsir Hafþór og segir atvikið afar eftirminnilegt.

„Þetta er kannski ekki óalgeng sjón á meðal sjómanna en vegna fjölda höfrunganna og veðurblíðunnar var þetta einstök upplifun,“ segir Hafþór í samtali við mbl.is. 

Hafþór festi tilkomumikla uppákomuna á filmu og deildi á samfélagsmiðlum. Líkt og sjá má á myndskeiðinu hér að neðan er engu um logið að um ævintýralega upplifun hafi verið að ræða.

• Blogga um frétt