Stunda veiðarnar við krefjandi skilyrði

Helgi Aage Torfason er skipstjóri á Kristrúnu og segir í síðasta blaði 200 mílna að hún hafi reynst mjög vel, en skipið stundar grálúðuveiðar í net og er aðallega að veiðum norður af Íslandi og niður að miðlínu Grænlands og Íslands. „Við erum eina skipið sem veiðir grálúðu í net allan ársins hring og geta aðstæður á miðunum oft verið krefjandi,“ útskýrir Helgi.

Kristrún RE-177 er gerð út á grálúðu allan ársins hring.

„Þá er ekki auðvelt að nálgast grálúðuna því hún er sá nytjastofn við Íslandsstrendur sem lifir á hvað mestu dýpi – yfirleitt á 250 til 500 föðmum, sem er á við allt að átta fótboltavelli. Kalla veiðarnar á gott spil og öflugan búnað, og fara veiðarnar fram á einu erfiðasta hafsvæði landsins.“

Við komuna til Íslands voru gerðar ýmsar breytingar á Kristrúnu og var t.d. skipt um millidekk í skipinu, brúin tekin í gegn og siglingatæki endurnýjuð.

„Meðal þess sem breyttist með nýju Kristrúnu var að við komum fyrir sjálfvirku frystitæki með sjálfvirkum útslætti sem hefur létt töluvert störfin um borð,“ segir Helgi.

Umfjöllunina má lesa í síðasta blaði 200 mílna.