Oddi á Patreksfirði festir kaup á Örvari

Sjávarútvegsfyrirtækið Oddi hf. á Patreksfirði hefur fest kaup á Örvari SH-777 sem Hraðfrystihús Hellisands á Snæfellsnesi hefur gert út. Í tilkynningu á Facebook-síðu Odda kemur fram að skipið mun leysa af Núp BA-69 frá og með áramótum, en Núpur hefur verið gerður út af Odda frá 1990.

Örvar var smíðaður árið 1992 í norsku skipasmíðastöðinni Solstrand Slip & Baatbyggeri og er þannig töluvert yngri en Núpur sem smíðaður var árið 1976 í Póllandi. Jafnframt er Örvar stærra skip og telur 410 rúmlestir, 39 metra að lengd og 9 metra að breidd á móti 237 rúmlestum Núps sem er 35,5 metrar a lengd og 7,6 metra að breidd.

Oddi hefur gert út Núp BA frá árinu 1990. mbl.is/Sigurður Bogi

Nýtt skip Odda er jafnframt sagt „mjög vel útbúið fyrir meðferð á hráefni og allur aðbúnaður er mjög góður fyrir áhöfnina. Oddi hf hefur fyrst og fremst gert út á línu síðustu áratugi og byggt upp öflug viðskipti með línuveitt hráefni fyrir kröfuhörðustu markaðina og með kaupunum á Örvari hefur stefna félagsins verið mörkuð á sömu braut.“

• Blogga um frétt