Samherji opnar dyr frystihúss félagsins á Dalvík og býður almenningi að líta við í tilefni fiskidagsins mikla sem fer hátíðlega fram um helgina. Um er að ræða eina af tæknivæddustu fiskvinnslum á heimsvísu.

„Það hefur verið mikil ásókn í að skoða húsið og alla tæknina sem hérna er til staðar en aðgengið er mjög takmarkað þar sem um matvælaframleiðslu er að ræða. Okkur fannst ekki koma annað til greina en að sýna þetta magnaða hús á sjálfum Fiskideginum mikla, þar sem fiskur og sjávarafurðir eru í öndvegi,“ segir Sigurður Jörgen Óskarsson yfirverkstjóri í færslu á vef Samherja.

Frystihúsið var tekið í notkun í miðjum Covid-faraldri og hefur frá þeim tíma ekki verið hægt að sýna húsið í því umfangi sem stóð til að gera.

Frétt af mbl.is

Samherji tekur milljarða fjárfestingu í notkun

„Gangið í bæinn“

Samherji styrkir hátíðinarhöld fiskidagsins með ýmsum hætti, rétt eins og flest fyrirtæki á Dalvík, og koma fjölmargir starfsmenn Samherja að undirbúningi fiskidagsins mikla. Frystihúsið verður opið laugardag frá 12:30 til 14:30.

„Ég er nokkuð viss um að gestir verða margs vísari um íslenskan sjávarútveg eftir heimsóknina og hversu framarlega við Íslendingar stöndum. Fyrir hönd Samherja og starfsfólksins segi ég einfaldlega gjörið svo vel, gangið í bæinn og skoðið heimsins fullkomnasta fiskvinnsluhús,“ segir Sigurður Jörgen.

Fjöldi fólks sækir Dalvík heim á fiskidaginn mikla. Ljósmynd/Samherji

Afhenda gestum góðgæti

Þá segir í færslunni að Fanney Davíðsdóttir, matráður í mötuneyti Samherja á Dalvík, mun sjá um að afhenda gestum á öllum aldri góðgæti ásamt Júlíu Ósk Júlíusdóttur sem einnig er matráður í mötuneytinu.

„Já við verðum í gamla frystihúsinu og gefum fólki sælgæti sem þangað kemur, þetta verður bara stuð við búumst við fjölda gesta. Fiskidagurinn mikli hefur komið Dalvík á kortið og minnir okkur líka á að sjávarútvegurinn er okkar helsta atvinnugrein. Ég er stolt af því að starfa í greininni og íslenskur fiskur er besta hráefnið sem ég fæ til mín í mötuneytinu,“ segir Fanney.

Ljósmynd/Samherji

Sögulegir tónleikar

Á laugardagskvöldinu verða Fiskidagstónleikar í boði Samherja, sem enda með flugeldasýningu.

„Margir af þekktustu listamönnum landsins stíga á svið og skemmta fólki á öllum aldri. Friðrik Ómar, Eyþór Ingi og Matti Matt ásamt gestasöngvurum, hljómsveit, raddsveit og dönsurum sjá til þess að allir skemmti sér konunglega. Ég get lofað því að þessir tónleikar verða þeir glæsilegustu í sögu Fiskidagsins mikla og þá er nú mikið sagt,“ segir Sigurður Jörgen.

Yfirverkstjóri í frystihúsi Samherja væntir þess að tónleikarnir verði þeir bestu í sögu hátíðarinnar. Ljósmynd/Samherji

Tengdar fréttir

Samherji

Samherji hafði betur gegn Odee

• Hafa fjarfest meira en nemur hagnaði
• Fyrrverandi starfsfólki „sé haldið í spennitreyju“
• Þúsundir smáskilaboða fundust í tölvu
• Sumarstarfsmenn gegna lykilhlutverki hjá ÚA

» Fleiri tengdar fréttir

• Blogga um frétt