Segja 27 upp og leggja niður starfsstöð

Skaginn 3X hefur sagt upp 27 starfsmönnum fyrirtækisins á Ísafirði og ákveðið að leggja niður starfsstöð fyrirtækisins þar. Samþætta á alla framleiðslu fyrirtækisins á Akranesi, en hingað til hefur félagið haft starfsstöðvar í báðum sveitarfélögum. Þungum rekstri fyrirtækisins er kennt um þessa niðurstöðu.

Árið 2020 var tilkynnt um kaup alþjóðlega fyrirtækisins Baader á 60% hlut í Skaganum 3X og var þá haft eftir sveitarstjórnum beggja sveitarfélaga sem tóku mjög jákvætt í kaupin, en fulltrúar fyrirtækjanna höfðu þá kynnt áform þess sem áttu að fela í sér vöxt og aukna framleiðslu, ásamt því að stórefla rannsóknir og þróunarstarf á báðum stöðum.

Frétt af mbl.is

Baader kaupir Skagann 3X

Í fyrra var svo greint frá því að Baader hefði keypt þau 40% sem eftir stóðu, en síðar það sama ár tók Sigsteinn Grétarsson við sem forstjóri Skagans, en hann hefur áður meðal annars starfað sem aðstoðarforstjóri Marels.

Baader er þýskt stór­fyr­ir­tæki sem sér­hæf­ir sig í gerð mat­vinnslu­véla. Skag­inn 3x er mat­væla­vinnslu­fyr­ir­tæki.

Í tilkynningu frá Skaganum 3X í dag segir að ákvörðunin um að leggja starfsstöðina á Ísafirði niður sé afar þungbær, en byggist á umfangsmikilli endurskipulagningu. Hafi ákvörðunin þegar verið kynnt bæjaryfirvöldum á Ísafirði og verkalýðsfélögum.

„Rekstur Skagans 3X hefur verið mjög þungur síðustu misseri og eins og áður hefur komið fram þurfti fyrirtækið að fara í viðamikið endurmat á skuldbindingum og kröfum í kjölfar eigendaskipta. Þá hefur ólga verið á helstu mörkuðum þess síðustu misseri, bæði vegna stríðsátaka sem tengjast Rússlandi og Covid heimsfaraldrinum. Við höfum velt við hverjum steini þar sem þær rekstrar- og markaðslegu forsendur sem lagt var upp með við eigendaskiptin hafa ekki gengið eftir. Niðurstaðan varð sú að samþætta alla framleiðslu á Akranesi,“ er haft eftir Sigsteini í tilkynningunni.

Áfram á að vinna að því að samþætta starfsemina hér á landi við alþjóðlega starfsemi Baader.

• Blogga um frétt