Skólabörn frædd um sjómennsku

Veiði- og fræðsluferðir fyrir nemendur sjötta bekkjar í skólum Akureyrar og Eyjafjarðar hófust í gær.

Er þetta sautjánda árið sem ferðirnar eru farnar en um er að ræða samstarfsverkefni Hollvina Húna II, Akureyrarbæjar, Samherja og auðlindadeildar Háskólans á Akureyri.

Siglt var út á Eyjafjörð á Húna II þar sem rennt var fyrir fisk og eftir fræðslu um veiðibúnað, bátinn og gildi fisks í mataræði fólks var aflinn flakaður, grillaður og snæddur.

Verkefnið nefnist „Frá öngli til maga“, og er markmiðið að auka áhuga og skilning þátttakenda á lífríki hafsins, sjómennsku og hollustu sjávarfangs.

Vel hefur gengið að manna ferðirnar sem unnar eru í sjálfboðavinnu.