Gullni hringurinn afgreiddur til Frakklands

Bátasmiðjan Trefjar í Hafnarfirði hefur afgreitt nýjan Cleopatra bát til Le Croisic á sunnanverðri Bretaníu í Frakklandi. Báturinn er smíðaður fyrir útgerðarmanninn David Le Dreau sem verður sjálfur skipstjóri á bátnum sem hefur fengið nafnið Circle D’Or eða Gullni hringurinn á íslensku, en nafnið hefur vísun í hinn eina sanna íslenska gullna hring. 

Fram kemur í tilkynningu frá trefjum að til standi að gera bátinn út frá Le Croisic allt árið og að hann mun stunda jöfnum höndum veiðar með línu, netum og gildrum. Circle D‘Or mun hefja veiðar fyrir lok ágústmánaðar og eru alls þrír í áhöfn.

Circle D’Or er af gerðinni Cleopatra 33 og er 11brúttótonn. Pláss er fyrir tólf 380 lítra kör í lest og er um borð einnig svefnpláss fyrir þrjá auk eldunaraðstöðu með eldavél, örbylgjuofn og ísskáp.

Aðalvél bátsins er af gerðinni Cummins QSC8.3M tengd ZF286IV gír og siglingatæki frá Furuno og Simrad. Öryggisbúnaður bátsins er frá Viking.

• Blogga um frétt