Sendi friðarmerkið og synti á brott
Setja bókamerki
Sjósundmaður lagði leið sína að hvalveiðibátum Hvals hf. í kvöld og sendi mótmælendum, sem staðið hafa í möstrum bátanna síðan klukkan 5 í morgun, friðarmerkið. Synti hann svo á brott.
Átti hann í orðaskiptum við einhvern á bryggjunni, sem blaðamaður náði ekki að greina, áður en hann spurði „hvernig átti ég að vita það?“.
Aðgerðarsinnarnir Elissa Biou og Anahita Babaei hlekkjuðu sig við möstur bátanna í morgun og hafa verið þar síðan, til þess að mótmæla ákvörðun Svandísar Svavarsdóttur um að heimila hvalveiðar á ný.
Lögreglan hefur verið á svæðinu meira og minna í allan dag og hefur samningahópur lögreglunnar þrisvar sinnum klifrað upp og reynt að telja konurnar á að koma niður.
Skömmu áður en sundmaðurinn heilsaði upp á mótmælendur sigldi báturinn Sóla fram hjá hvalveiðibátunum. Um borð var maður sem hélt á skilti sem á stóð: „Go home and shame on you“ sem þýða mætti sem: „Farið heim og skammist ykkar“.
Dansa og syngja með mótmælendum
Fjöldi fólks hefur lagt leið sína á Reykjavíkurhöfn í dag til þess að sýna konunum stuðning í verki. Þegar líða tók á kvöldið voru þar settir upp hátalarar og má sjá konurnar dansa og syngja með öðrum mótmælendum.
Ásgeir Þór Ásgeirsson, yfirlögregluþjónn hjá lögreglunni á höfuðborgarsvæðinu, sagði í samtali við mbl.is í dag að ekki væri búið að ákveða um næstu skref, en stúlkurnar fengju þó ekkert að borða fyrr en þær kæmu niður.
Einsdæmi að ekki séu samræmd próf
Óráðleg og afdrifarík ákvörðun skólayfirvalda
Kæru vættir, færið okkur logn!
Engar reglur til að takast á við stöðuna
Brotin eftir greiningarferlið
Foreldrar skilja ekki einkunnir barna sinna