Mótmælendurnir Anahita og Elissa, sem höfðu komið sér fyrir í tunnum á möstrum hvalveiðiskipanna Hvals 8 og Hvals 9, virðast vilja koma niður eftir samræður við lögreglumann.

Þær hafa verið uppi í möstrunum í tæpan einn og hálfan sólarhring til að mótmæla væntanlegum hvalveiðum fyrirtækisins Hvals.

Lögreglumaður hélt upp í möstrin og ræddi við þær, en eftir samtal við Anahitu þar sem þau kölluðu einnig til Elissu, þá virtist Anahita gefa stuðningsfólki sínu handabendingar sem bentu til þess að þær vildu koma niður.

Lögreglumaðurinn er kominn niður úr möstrunum og eru þær enn uppi, en líklegt er að þær fái öryggisbúnað til að komast niður ef af því verður.

„Afsakið, en við getum ekki verið hér mikið lengur,“ hrópaði Anahita til hvalavina á bryggjunni.

Uppfært: Lögregluþjónn er aftur kominn upp í mastrið til Anahitu og er hún komin í sigbelti. Sagði hún áðan við stuðningsfólk sitt að hún væri á leiðinni niður og baðst afsökunar á því.

Tengdar fréttir

Hvalveiðar

Meirihluti óánægður með ákvörðun Bjarna

• Lög um hvalveiðar úrelt og krefjast endurskoðunar
• Hrefnuveiðar hefjast á Ísafirði í vor
• Gagnrýna ákvarðanir starfsstjórnar
• Segir næstu stjórn sitja uppi með ákvörðun Bjarna

» Fleiri tengdar fréttir

• Blogga um frétt