Hvalbátarnir halda á miðin í dag

Hvalbátarnir, Hvalur 8 og Hvalur 9, munu halda út til leitar síðdegis í dag á miðunum suður, suðvestur og vestur af landinu. Ráðast mun af veðri hvernig til mun takast með veiðarnar, en ekki er unnt að stunda hvalveiðar nema í sæmilega lygnum sjó sem og að dagsbirtu njóti við.

Ætla má að sjólag á miðunum sé að verða hagsfellt fyrir veiðarnar, enda færu bátarnir vart á miðin að öðrum kosti.

Hvalbátarnir héldu úr Reykjavíkurhöfn síðdegis í gær og var ferðinni heitið upp í Hvalfjörð. Að sögn Kristjáns Loftssonar, framkvæmdastjóra Hvals hf. er ætlunin að bátarnir taki þar veiðarfæri og ýmsan þann búnað um borð sem nauðsynlegur er til veiðanna.

• Blogga um frétt