Erlent flutningaskip tók niðri við Akurey

Séraðgerðasveit og þyrlusveit Landhelgisgæslunnar voru kallaðar út um klukkan þrjú í dag er erlent flutningaskip tók niðri við Akurey þegar skipið var á leið frá Reykjavík.

Í tilkynningu frá Landhelgisgæslunni segir að stjórnstöð Landhelgisgæslunnar var þegar gert viðvart en grunur lék á að mengun kæmi frá skipinu.

Séraðgerðasveit á varðbátnum Óðni kölluð út til að kanna aðstæður og þyrlusveitin var einnig kölluð út til að kanna aðstæður úr lofti.

Slökkvilið höfuðborgarsvæðisins mun draga olíuvarnargirðingu umhverfis flutningaskipið ásamt séraðgerðasveit Landhelgisgæslunnar. Ljósmynd/Landhelgisgæslan

Athugunin leiddi í ljós að þunn olíubrák reyndist vera á svæðinu og var ákveðið að flutningaskipið héldi til hafnar í Reykjavík þar sem mengunarvarnargirðing verður sett umhverfis skipið.

Slökkvilið höfuðborgarsvæðisins mun draga olíuvarnargirðinguna umhverfis flutningaskipið ásamt séraðgerðasveit Landhelgisgæslunnar.

Þá segir að Umhverfisstofnun hefur verið gert viðvart og rannsókn á tildrögum atviksins er í höndum rannsóknarnefndar samgönguslysa.

• Blogga um frétt