Virðist vera smávægilegur olíuleki

Olíumengunin sem varð af erlenda flutningaskipinu sem tók niðri við Akurey er minniháttar, að sögn Aðalbjargar Birnu Guttormsdóttur, sviðsstjóra um­hverf­is­gæða hjá Um­hverf­is­stofn­un.

Frétt af mbl.is

Erlent flutningaskip tók niðri við Akurey

„Þetta virðist vera mjög smávægilegt. Landhelgisgæslan er búin að meta aðstæður og skipið er á leið inn til hafnar,“ segir Aðalbjörg í samtali við mbl.is. 

Stjórnstöð Landhelgisgæslunnar barst tilkynning um atvikið um þrjúleytið í dag. Séraðgerðasveit á varðbátnum Óðni var kölluð út til að kanna aðstæður og eins þyrlusveit til að meta aðstæður úr lofti.

Skipið strandaði við Akurey. Ljósmynd/Landhelgisgæslan

Engin yfirvofandi hætta

Athugunin leiddi í ljós að þunn olíubrák reyndist vera á svæðinu. Slökkvilið höfuðborgarsvæðisins mun draga olíuvarnargirðingu umhverfis flutningaskipið í höfn ásamt séraðgerðasveitinni.

Aðalbjörg segir að olíubrákin muni líklega að öllu leyti gufa upp. 

Hún segir að Umhverfisstofnun verði á hliðarlínunni en er skipið kemur í höfn munu hafnaryfirvöld taka við því.

„Eins og er er engin yfirvofandi hætta og það er lítil olía,“ segir hún.

• Blogga um frétt