Lýkur sex milljarða hlutafjáraukningu

Landeldisfyrirtækið Laxey í Vestmannaeyjum hefur lokið við sex milljarða króna hlutafjáraukningu. Í tilkynningu frá félaginu kemur fram að fjármagnið komi frá íslenskum fjárfestum. Félagið stendur fyrir uppbyggingu á fiskeldisstöð í Vestmannaeyjum, annars vegar seiðaeldisstöð í Friðarhöfn og hins vegar áframeldisstöð í Viðlagafjöru. Gert er ráð fyrir framleiðslu á 32.000 tonnum af laxi árið 2031.

Áframeldisstöðin verður byggð í sex jafnstórum áföngum, en stefnt er að því að fyrsti áfangi verði tilbúinn um mitt ár 2024 og fyrsta slátrun fari fram síðla árs 2025.

Frétt af mbl.is

Landeldi undirbúið á umfangsmiklu athafnasvæði

Í tilkynningunni kemur fram að skilyrði til laxeldis á landi í Vestmannaeyjum séu afar góð og aðstæður hagstæðar. Notast er við endurnýtingarkerfi á vatni í áframeldi, þar sem um 65% af sjónum eru endurnýtt en 35% eru ferskur jarðsjór sem dælt er upp úr borholum á svæðinu.

Gert er ráð fyrir að yfir 50 manns muni starfa hjá fyrirtækinu þegar það hefur náð fullri framleiðslugetu. Fyrri eigendur fyrirtækjanna ÓS ehf. og LEO Seafood ehf. hafa tekið þátt í verkefninu frá upphafi og verða kjölfestufjárfestar í Laxey. Fjölskyldan hefur stundað sjávar­útveg í Vestmannaeyjum í 75 ár.