Bjarni Sæmundsson strand – 8 komnir frá borði

Tvö skip slysavarnarfélagsins Landsbjargar hafa nú komið átta frá borði rannsóknarskipsins Bjarna Sæmundssonar sem strandaði í Tálknafirði í kvöld. 20 manns voru um borð í skipinu þegar það strandaði.  

Frá vettvangi í kvöld. Ljósmynd/Landsbjörg

Samkvæmt upplýsingum frá Landhelgisgæslunni barst tilkynning um að skipið hafi strandað í  Sveinseyri á móti innsiglingunni í Tálknafirði klukkan 21.15 í kvöld.

Tveir bátar og þyrla í viðbragðsstöðu

Tveir bátar á vegum slysavarnarfélagsins Landsbjargar á Patreksfirði og í Tálknafirði hafa verið ræstir út og er þyrla Landhelgisgæslunnar í viðbragstöðu. 

Ljósmynd/Landsbjörg

Ásgeir Erlendsson, upplýsingafulltrúi Landhelgisgæslunnar, segir veðurskilyrði á svæðinu þokkaleg og að engin slys hafi orðið á fólki. Þá eigi eftir að koma í ljós hvort skipið komist á flot á háflóði sem von er á klukkan 23.30. 

Björgunarsveitir að störfum

Jón Þór Víglundsson, upplýsingafulltrúi Landsbjargar, segir björgunarsveitir frá Tálknafirði og Patreksfirði nú starfa á vettvangi. 

Ljósmynd/Landsbjörg

„Þarna er björgunarskipið Vörður 2 frá Patreksfirði og báturinn Njörður frá Tálknafirði. Það voru átta manns ferjaðir í land með Nirði áðan og færðir í íþróttahúsið,“ segir Jón Þór sem bætir við að verið sé að opna fjöldahjálparstöð í íþróttahúsinu

Fréttin verður uppfærð. 

• Blogga um frétt