Síldarvinnslan hefur gengið frá kaupum á helmingshlut í Ice Fresh Seafood, sölufélags í eigu Samherja hf., og er verðmæti viðskiptanna 32,2 milljónir evra sem er jafnvirði 4,6 milljarða króna. Þar af eru greiddar 10,7 milljónir fyrir kaup á hlutum sem eru í eigu Samherja og svo 21,5 milljónir evra vegna útgáfu nýs hlutafjár í Ice Fresh Seafood.

Verðmæti Ice Fresh Seafood í viðskiptunum er metið 42,9 milljónir evra sem jafngildir 1,76 sinnum bókfært virði eigin fjár þess hinn 31. desember 2022 en heildarvirði Ice Fresh Seafood verður  64,4 milljónir evra eftir hlutafjáraukninguna.

Tilkynnt var um viðræður um mögulega fjárfestingu Síldarvinnslunnar í félaginu í vor.

Frétt af mbl.is

Síldarvinnslan skoðar kaup í félagi Samherja

Kaupir erlend félög úr samstæðu Samherja

Fram kemur í tilkynningu á vef Síldarvinnslunnar að samhliða viðskiptunum mun Ice Fresh Seafood  ganga frá kaupum á eignarhlutum í erlendum sölufélögum sem Síldarvinnslan hefur átt viðskiptasamband við undanfarin ár.

„Um er að ræða helmingshlut í Seagold Ltd. í Bretlandi, 100% eignarhlut í Ice Fresh Seafood SAS í Frakklandi, 67% hlutafjár í Ice Fresh Seafood Spain S.L. og helmingshlut í Aquanor Marketing Inc. í Bandaríkjunum fyrir samtals 13,9 milljónir evra. Verðmæti félaganna fjögurra í þessum viðskiptum er 1,37 sinnum bókfært virði eigin fjár þeirra í árslok 2022. Félögin voru áður hluti af samstæðu Samherja Holding ehf. og unnið hefur verið að viðskiptunum frá því í lok árs 2022.“

Einnig mun Ice Fresh Seafood ganga frá kaupum á helmingshlut í sölufélaginu Cabo Norte S.A. á Spáni af Síldarvinnslunni fyrir 4,9 milljónir evra, jafnvirði 714 milljóna króna. „Virði hlutarins byggir á því að verðmæti Cabo Norte S.A. sé 1,3 sinnum bókfært virði eigin fjár félagsins í lok árs 2022.“

Vék af fundi

Eins og fram hefur komið er Ice Fresh Seafood að fullu í eigu Samherja hf. en það félag er jafnframt eigandi að 30,06% hlut í Síldarvinnslunni hf. Þá er Þorsteinn Már Baldvinsson, stjórnarformaður Síldarvinnslunnar hf., forstjóri Samherja hf.

„Með vísan til ákvæða laga og starfsreglna stjórnar þá vék Þorsteinn Már sæti innan stjórnar Síldarvinnslunnar hf. við meðferð málsins og kom ekki að ákvörðunartöku vegna þess,“ segir í tilkynningunni.

Þorsteinn Már Baldvinsson, stjórnarformaður Síldarvinnslunnar, vék af fundi við afgreiðslu kaupa á hlut í félagi Samherja, en hann er forstjóri Samherja. Ljósmynd/Þórhallur Jónsson

Vaxtartækifæri

Fram kemur að velta Ice Fresh Seafood var 337 milljónir evra árið 2022 og velta erlendu sölufélaganna var 194 milljónir evra. Samanlögð velta að teknu tilliti til sölu milli félaga var 485 milljónir evra. Samanlögð EBITDA félaganna var 6,7 milljónir evra leiðrétt fyrir einskiptis kostnaði hjá Ice Fresh Seafood vegna stríðsins í Úkraínu.

Er í tilkynningunni bent á að fjárfestingin í sölufélaginu sér í samræmi við stefnu Síldarvinnslunnar um að nýta vaxtartækifæri sem bjóðast og stuðla að aukinni áhættudreifingu og arðsemi í rekstri. „Ice Fresh Seafood er sölufyrirtæki sem býr yfir margra ára reynslu og sérþekkingu við sölu- og markaðssetningu sjávarafurða. Gústaf Baldvinsson er framkvæmdastjóri Ice Fresh Seafood og hefur gegnt því starfi frá stofnun fyrirtækisins í janúar 2007. Sölunet fyrirtækisins nær til yfir 60 landa og á bak við það er áratuga þekking og viðskiptasambönd á helstu mörkuðum fyrir íslenskt sjávarfang.“

Gunnþór Ingvason, framkvæmdastjóri Síldarvinnslunnar. Ljósmynd/Samherji

„Fjárfesting í Ice Fresh Seafood er gerð í því skyni að styrkja sölu- og markaðsmál félagsins og er rökrétt framhald af þróun sem hefur átt sér stað innan Síldarvinnslunnar hf. á undanförnum árum og birtist meðal annars í kaupum á Vísi hf. í Grindavík á síðasta ári. Ice Fresh Seafood hefur í mörg ár verið leiðandi í sölu- og markaðssetningu íslenskra sjávarafurða. Með þessum viðskiptum er Síldarvinnslan að komast lengra í virðiskeðju sjávarútvegs og nær neytendum þeirra afurða sem við framleiðum. Í því felast ákveðin sóknartækifæri,“ segir Gunnþór Ingvason, framkvæmdastjóri Síldarvinnslunnar, í tilkynnignunni.

Gunnþór mun greina nánar frá viðskiptunum á fjárfestakynningu í kjölfar birtingar uppgjörs þriðja ársfjórðungs 2023, sem er áætluð 23. nóvember.

Tengdar fréttir

Samherji

Skipin í höfn og komin í sparifötin

• Hæstiréttur hafnar kröfu Þorsteins Más
• Samherji hafði betur gegn Odee
• Hafa fjarfest meira en nemur hagnaði
• Fyrrverandi starfsfólki „sé haldið í spennitreyju“

» Fleiri tengdar fréttir

Síldarvinnslan

Jólasíld ársins í fötur

• Samherji tekur Birting á leigu
• Fjölnir til Noregs
• Kaup Síldarvinnslunnar ganga til baka
• Sjóvá og Síldarvinnslan áfram í samstarfi

» Fleiri tengdar fréttir

• Blogga um frétt