Lýkur 13,7 milljarða króna fjármögnun

Fiskeldisfyrirtækið First Water í Þorlákshöfn, sem starfrækir seiðaeldisstöð við Hveragerði og áframeldisstöð við Þorlákshöfn, hefur lokið 13,7 milljarða króna fjármögnun sem fyrst var sagt frá í júlí sl. 

Í tilkynningu frá félaginu segir að það hafi í byrjun þess mánaðar tilkynnt um lok 82 milljóna evra fjármögnunar eða um 12,3 milljarða króna á þáverandi gengi með nýju hlutafé. Á þeim tíma hafi verið tilkynnt að hluti fjárfesta væri með fyrirvara um samþykki stjórnar. „Í dag lauk þeim hluta og fyrir liggur að fjárfestar komu í heild með samtals 13,7 milljarða króna í hlutafé eða um 94 milljónir evra miðað við gengi EUR/ISK í dag,“ segir í tilkynningunni.

Stoðir áfram stærst

Fjárfestingarfélagið Stoðir er samkvæmt tilkynningunni áfram stærsti hluthafi First Water eftir hlutafjáraukninguna. Framtakssjóðurinn Horn IV ásamt breiðum hópi innlendra og erlendra fjárfesta á borð við lífeyrissjóði og einkafjárfesta koma nýir að félaginu. Fyrirtækjaráðgjöf Landsbankans annaðist umsjón hlutafjáraukningarinnar.

Með hlutafjáraukningunni er fjármögnun uppbyggingar fyrsta áfanga landeldisstöðvar First Water tryggð að því er segir í tilkynningunni. „Framleiðslugeta fyrsta áfanga verður um 8 þúsund tonn af laxi á ári en áætlanir félagsins miða við að heildarframleiðsla verði að lokum um 50 þúsund tonn og að uppbyggingu verði lokið árið 2028. Áformað er að skrá First Water á hlutabréfamarkað 2025 og sækja samhliða skráningu aukið fjármagn til áframhaldandi uppbyggingar.“

Eggert Þór Kristófersson.

Ástæða til bjartsýni

Eggert Þór Kristófersson, forstjóri First Water, segir í tilkynningunni að félagið sé með frábært verkefni í höndunum. Það endurspeglist í því að verið sé að ljúka vel heppnaðri hlutafjáraukningu, þrátt fyrir erfiðar markaðsaðstæður. „Það er því full ástæða til bjartsýni og við höldum ótrauð áfram uppbyggingu umhverfisvæns og sjálfbærs laxeldis á landi.“

• Blogga um frétt