Jason Momoa sendir Alþingi bréf
Setja bókamerki
32 erlendir ríkisborgarar hafa sent alþingi erindi er varða frumvarp um hvalveiðibann. Þeirra á meðal er Hollywood-leikarinn Jason Momoa, sem er m.a. þekktur fyrir að leika ofurhetjuna Aquaman – konung Atlantis.
Momoa segir að sér sé afar annt um sjóinn, rétt eins og DC-ofurhetjunni sem hann leikur, og er þetta ekki í fyrsta sinn sem hann tjáir sig um hvalveiðar Íslendinga.
Hann er heldur ekki eini bandaríski leikarinn sem hefur tjáð sig um veiðarnar. Fyrr í haust hótuðu allnokkrar Hollywood-stjörnur sniðgöngu á Íslandi, skyldi Svandís Svavarsdóttir matvælaráðherra ákveða að framlengja ekki tímabundið hvalveiðibann – sem hún gerði samt sem áður, eins og frægt er.
Frumvarpið sem hér um ræðir var lagt fram þann 14. september af nokkrum þingmönnum úr Pírötum, Viðreisn, Flokki fólksins og Samfylkingunni.
„Tækifæri til þess að setja fordæmi fyrir allan heiminn“
Kate True, framkvæmdastjóri fyrirtækisins Momoa Enterprises sem er í eigu havaíska leikarans, sendi Alþingi umsögnina sem er þó undirrituð af sjálfri Hollywood-stjörnunni. Bréf Momoa er eftirfarandi:
Sem stoltur aðgerðasinni fyrir sjávarlíf, stend ég með óhagganlegum stuðningi við hvalveiðibanni og verndun hvala á Íslandi og víða um heim.
Hvalir eru stórkostlegar, gáfaðar verur sem leika lykilhlutverk í því að halda jafnvægi í hafinu okkar. Þeirra velferð er í eðli sínu tengd heilsu plánetunnar okkar. Okkar ábyrgð er að vernda þessi merkilegu dýr og þeirra vistkerfi.
Ísland, með sitt hrífandi landslag og gnægðarfullt sjávarlíf, hefur einstakt tækifæri til þess að setja fordæmi fyrir allan heim. Með því að velja veg varðveislu og ábyrgrar umhverfisráðmennsku, getum við tryggt framtíð þar sem hvalir fái að halda áfram að þrífast og eru virtir til frambúðar.
Þakkir [„Mahalo“] fyrir ykkar umhugsun,
Jason Momoa
32 erindi en aðeins eitt á íslensku
Á vef Alþingis má sjá 32 innsend erindis- og umsagnarbréf um frumvarpið. Öll eru þau á ensku eða spænsku, að undanskilinni umsögn Bandaríkjamannsins Laken Arnold, sem er skrifuð á fremur bjagaðri íslensku – en íslensku samt sem áður.
Erindin eru öll mislöng en nefna flest svipuð atriði – að hvalir séu gáfaðar lífverur, íslenskt efnahagskerfi hagnist lítið sem ekkert á hvalveiðum og að hvalir séu mikilvægir fyrir vistkerfi sjávar, svo fátt sé nefnt. Þó hrósa nokkrir fegurð landsins jafnóðum.
Þá má þess geta að Imogen Sawyer, hjá Paul Watson-samtökunum, skilaði umsögn til Alþingis um frumvarpið en Sawyer var viðstödd þegar Anahita Babaei og Elissa Biou mótmæltu úr tunnum hvalveiðiskipanna Hval 8 og 9 í haust. Í erindi sínu nefnir hún m.a. að hvalveiðar brjóti ítrekað í bága við lög um velferð dýra.
Viti sínu fjær að sjá hvalakjöt á matseðli
Sarah Bußmann nokkur segir eftirfarandi í sinni umsögn um frumvarpið sem send var inn í dag:
„Mig hefur ávallt langað að heimsækja Ísland vegna þess að náttúran ykkar er ævifögur. En það eru fjölmargar áhyggjur uppi er tengjast lögum ykkar um velferð dýra, eins og blóðmör og sérstaklega hvalveiðar, sem ég bið ykkur um að binda enda á fyrir fullt og allt.“
Wendy Debeck, 55 ára kanadískur ríkisborgari, segist þrábiðja stjórnvöld um að banna hvalveiðar.
„Tengdadóttir mín er nýkomin heim frá ykkar fallega landi, viti sínu fjær að sjá hvalkjöt á matseðli. Hún sér eftir því að hafa ekki verið svo forsjál að taka myndband á þeirru stundu af sér standa upp og yfirgefa veitingastaðinn – hún sér eftir því að hafa ekki deilt þessu á samfélagsmiðlum. Þetta er hræðilegur hlutur sem þið leyfið, og smánarblettur á því sem annars er glæsilegt land,“ skrifar Debeck.
Andrew Ingham nokkur, sem getur ekki þjóðernis síns, nefnir í sinni umsögn að „hvalir eru gífurlega félagslyndar og afar gáfað verur sem finna fyrir ótta, sársauka og syrgja missi ættingja sinna eins og fílar“. Hann heldur áfram:
„Ef þú vilt bjarga heiminum frá loftslagskrísunni, kjóstu með þessu frumvarpi, þar sem [hvalveiðar] hjálpa hvorki íslensku efnahagskerfi né Íslendingum.“
Stóðu skógarþjófa að verki
Barn lést í árásinni
Forstjóri bendir á ábyrgð birgja vegna verðhækkana
Bein útsending: Ríkisstjórnarsamstarfið kynnt
Samfylking og Viðreisn gáfu loforð
„Börn heima sem maður myndi vilja hafa í skjóli“
„Mér finnst gamla Samfylkingin komin aftur“