Skapa enn meiri verðmæti með fullvinnslu

Jörundur Garðarsson er framkvæmdastjóri Hafkalks en félagið framleiðir hágæða fæðubótarefni úr kalkþörungum og þykja sumar vörur Hafkalks allra meina bót. Árið 2008 var Jörundur ráðinn til Íslenska kalkþörungafélagsins á Bíldudal til að gegna stöðu gæðastjóra og í framhaldinu hóf hann að leita leiða, í samvinnu við aðra heimamenn, til að skapa meiri verðmæti úr kalkþörungunum.

„Kalkþörungar eru rauðþörungar sem lifa á 5 til 30 metra dýpi. Kynslóð fram af kynslóð hafa safnast lög af kalkþörungum á sjávarbotninum og sums staðar hér í Arnarfirði eru þessi lög orðin þykk og eiga að duga til nýtingar í langan tíma,“ útskýrir Jörundur í viðtali í síðasta blaði 200 mílna. Hann bætir við að þau kalkþörungalög sem Bílddælingar nýta hafi myndast á mörgum öldum og árþúsundum.

Grunnvara fyrirtækisins heitir einfaldlega Hafkalk og samanstendur af fíngerðu og hreinu kalkþörungadufti í hylkjum. Jörundur segir reynsluna sýna að þessi vara örvi m.a. vöxt hárs og nagla og að regluleg notkun hafi hjálpað mörgum að lina eða losna við liðverki. Eitt og sér er kalkþörungaduftið ríkt að kalsíum og magnesíum, en einnig stein- og snefilefnum á borð við járn, selen, sink, mangan, kalíum og joð.

Lesa má viðtalið í heild sinni í síðasta blaði 200 mílna.