Nýja hafrannsóknaskipið Þórunn Þórðardóttir sjósett 15. desember
Setja bókamerki
Nýtt hafrannsóknaskip verður sjósett í skipasmíðastöðinni Astilleros Armón í Vigo á Spáni 15. desember nk.
Við sjósetningu mun skipið formlega hljóta nafnið Þórunn Þórðardóttir og fær það einkennisstafina HF 300. Skipið mun draga nafn sitt af Þórunni Þórðardóttur sem var fyrsta íslenska konan með sérfræðimenntun í hafrannsóknum og var m.a. frumkvöðull í rannsóknum á frumframleiðni smáþörunga í hafinu við Ísland, að því er segir í tilkynningu á vef Stjórnarráðsins.
Helsta afrek Þórunnar rannsóknir á heildarfrumframleiðni svifþörunga
Fram kemur, að eitt helsta afrek Þórunnar hafi verið rannsóknir og mat á heildarfrumframleiðni svifþörunga á Íslandsmiðum en svifþörungar eru undirstaða fæðukeðju hafsins. Þórunn var jafnframt á meðal fyrstu sjávarlíffræðinga til að nota geislakolsaðferð til að meta framleiðni í sjónum. Hún hlaut heiðursviðurkenningu Lýðveldissjóðs Alþingis fyrir framlag sitt til rannsókna á hafinu við Ísland. Þórunn lést 11. desember árið 2007.
„Þetta nýja og glæsilega skip eykur verulega möguleika Íslendinga til hafrannsókna,“ er haft eftir Svandísi Svavarsdóttur matvælaráðherra í tilkynningunni.
„Ég hef í mínu embætti lagt mikla áherslu á sjálfbæra nýtingu á auðlindum hafsins, þetta eru því einstaklega ánægjuleg tímamót. Ekki skemmir fyrir að skipið skuli nefnt eftir svo merkri vísindakonu og frumkvöðli sem Þórunn Þórðardóttir var og að nafngiftin skuli tilkynnt á sjálfum kvennaverkfallsdeginum.“
Þá segir, að stefnt sé að afhendingu skipsins til Íslendinga í október 2024 og verði þá siglt til landsins. Þórunn Þórðardóttir HF 300 mun leysa af hólmi Bjarna Sæmundsson HF 30 sem hefur þjónað sem hafrannsóknaskip í 53 ár. Skipið er nær 70 m langt og um 13 m breitt. Mikil áhersla hefur verið lögð á að skipið verði eins umhverfisvænt og sparneytið og unnt er, en um er að ræða tvíorkuskip með rafknúnum skrúfum. Meginorkugjafi er olía en einnig eru stórar rafhlöður um borð sem stuðla að betri orkunýtingu.
Blautum og köldum göngumönnum bjargað
Íslenska lögreglan skoðaði raftæki Sverris Þórs
„Vonum að gosið verði sem nyrst“
Til skoðunar að kæra virkjunarleyfi
Slökkvilið hefur lokið aðgerðum
Land risið um nær metra: Merki um kvikusöfnun
Vissu ekki neitt í rúma viku
„Þetta er bara hræðilegt“