Laxar í nokkrum sjókvíum í Tálknafirði voru meðhöndlaðir í september með lyfjum gegn laxalús en það bar lítinn árangur. Því þurfti að grípa til þess ráðs að farga um það bil milljón löxum sem hefðu ekki þraukað veturinn vegna sára sem myndast vegna ágengni lúsa.

Þetta segir Berglind Helga Bergsdóttir í samtali við mbl.is. RÚV greindi frá í síðustu viku og Heimildin greindi frá í dag.

Frétt af mbl.is

Lúsin að laga sig að íslenskum sjó

Arnarlax og Arctic Fish þurfa að farga löxum úr alls tólf sjókvíum. Samkvæmt Berglindi voru um milljón laxar í þessum sjókvíum í byrjun október.

Arnarlax þurfti að farga úr 6 sjókvíum, og er þeirri förgun lokið. Arctic Fish þurfti sömuleiðis að farga úr 6 sjókvíum, búið er að farga úr 2 sjókvíum og er förgun úr þeirri þriðju hafin. Förgun hófst vikuna 16.-22. október.

Alls eru 34 sjókvíar í öllum firðinum og í þeim um það bil 3,5 milljónir fiska samkvæmt talningu frá byrjun október.

Laxarnir hefðu látist af sárum sínum

Um mánaðamótin september-október snarhækkuðu lúsatölur að sögn Berglindar og það þrátt fyrir að búið væri að meðhöndla fiska með lúsalyfjum. Eldri lús virtist verða lyfjunum að bráð en ekki yngri lús.

Ef löxunum hefði ekki verið fargað þá hefðu fiskarnir dáið vegna sára og sýkinga sem koma í kjölfar bita frá laxalúsunum. Fiskurinn er bitinn og í sárið koma svo umhverfisbakteríur sem gera sárin enn umfangsmeiri.

Frétt af mbl.is

Heimila lyf á átta eldissvæðum: „Nauðsynlegt að grípa inn í“

„Það er verið að taka út þá fiska sem geta ekki lifað veturinn af. Það er verið að vinna að því samhliða að ná niður lúsatölum því þegar sjórinn kólnar þá minnkar gróandinn í fisknum,“ segir Berglind og bætir við:

„Það skín bara í höfuðkúpuna á þessum fiskum. Það sem veldur dauðanum er að saltið í sjónum fer í líkama fisksins í gegnum sárin og hann nær ekki að halda jónajafnvægi.“

Lúsavandinn víða

Berglind segir að lúsavandinn sé á fleiri stöðum en í Tálknafirði, eins og til dæmis í Arnarfirði og Dýrafirði. Lúsavandinn sé þó langtum verri í Tálknafirði en á öðrum stöðum

„Það eru sár byrjuð að myndast í Arnarfirði og á öðrum staðsetningum. Það er verið að meðhöndla með lyfjum og lúsameðhöndlunarbát á staðsetningum í Arnarfirði núna,“ segir Berglind.

Tengdar fréttir

Fiskeldi

Thor fær leyfi til fiskeldis

• Allt landeldi í uppnámi
• Eining um vöktun grunnvatns
• Tillaga að 12 þúsund tonna eldi Geo Salmo
• Sigurður Arnar til liðs við Laxey

» Fleiri tengdar fréttir

• Blogga um frétt