Mikilvægt að fiskneysla aukist

„Fólk ætti að borða meira af fiski, þó ekki sé nema vegna hollustu,“ segir Kolbrún Sveinsdóttir, sérfræðingur hjá Matís, í samtali við Morgunblaðið. Á Sjávarútvegsráðstefnunni 2023, sem haldin er nú í vikunni, flytur Kolbrún erindi sem ber yfirskriftina Þróun, áhrif og ímynd fiskneyslu. Titillinn segir allt um efnið sem flutt er á málstofu þar sem markaðsmál sjávarafurða verða í brennidepli.

Vitað er og staðfest að mikilvægi góðrar ímyndar sjávarafurða hefur aukist síðustu ár, þar sem neytendur vilja upplýsingar um vöruna sem þeir kaupa. Hollusta og umhverfisáhrif eru stórir þættir þegar fólk ákveður hvað vera skuli í matinn á heimili sínu eða velur á veitingastöðum. Allt þarf að vera á hreinu og að því leyti er staða íslenskra sjávarafurða sterk.