Vandamál að ekki sé skýr rammi um þörungagreinar

Félög sem nýta og rækta þörunga binda miklar vonir við að stefnumótun stjórnvalda á sviði lagareldis skili skýrari ramma utan um greinina og auknum stuðningi við þekkingu og menntun. Samtök þörungafélaga voru stofnuð af nokkrum félögum á síðasta ári en samtökunum hefur vaxið fiskur um hrygg og eru meðlimir nú um 30 meðlimir.

„Á heimsvísu eru framleiddar 36 milljónir tonna af stórþörungum á ári bæði til manneldis og til notkunar í ýmiss konar framleiðslu. Þetta er rúmlega þrjátíu sinnum meira en íslenski fiskiskipaflotinn veiðir á ári. Þetta er mjög stór grein en langstærst í Asíu. Hún hefur verið að þróast í hinum vestræna heimi og þegar kemur að ræktuninni er Ísland mikill eftirbátur annarra nágrannaþjóða,“ segir Sigurður Pétursson, formaður Samtaka þörungafélaga, í síðasta blaði 200 mílna.

Frétt af mbl.is

Íslandi komið á þörungakortið

Sigurður segir mikið undir að árangur náist í ræktun þörunganna. „Ef við horfum til tveggja nýútkominna skýrslna, annars vegar um stefnumótun í lagareldi sem matvælaráðuneytið gaf út og hins vegar skýrslu Boston Consulting Group sem unnin var fyrir ráðuneytið, sést vel að með uppbyggingu ræktunar og sjálfbærri nýtingu getur ræktun smá- og stórþörunga orðið burðug stoð í atvinnulífinu. Þetta mun fjölga störfum og auka verðmætasköpun.“

Það hafi þó verið vandamál að ekki hafi legið fyrir skýr rammi fyrir greinina á Íslandi. „Þetta er ein af ástæðum þess að svona hagsmunasamtök eru stofnuð. Einstaklingar, lítil fyrirtæki og frumkvöðlar hafa verið að etja við hið opinbera í þeim tilgangi að hefja svona starfsemi og ekki mætt nægilegum skilningi. Það getur verið erfitt að átta sig á undir hvaða sviði viðkomandi atvinnugrein á að vera. Um er að ræða plöntur sem lifa á ljósi, þær þurfa ekkert fóður og falla því hvorki undir svið skelræktar né fiskeldis.“

Lesa má viðtalið við Sigurð í heild sinni hér.