Alltof margir farþegar voru í snekkjunni

Farþegaskipið Amelía Rose var stöðvað um átta sjómílum fyrir utan Akranes í dag og því vísað til hafnar eftir að í ljós kom að margfalt fleiri farþegar voru um borð en leyfi segir til um. 

Frétt af mbl.is

Gæslan og lögreglan með viðbúnað í Akraneshöfn

Þetta staðfestir Ásgeir Erlendsson, upplýsingafulltrúi Landhelgisgæslunnar, í samtali við mbl.is.

„Skipið var stöðvað við hefðbundið eftirlit,“ segir Ásgeir. „Varðskipið Þór var á svæðinu og varðskipin okkar fara í hefðbundið eftirlit og halda uppi eftirliti á hafsvæðinu umhverfis Ísland. Þess vegna var farið um borð í skipið.“

Ásgeir segir það hlutverk gæslunnar að fylgja settum reglum. Ljósmynd/Landhelgisgæslan

Rúmlega 80 manns um borð

Að sögn Ásgeirs reyndist farþegafjöldi skipsins margfaldur þeim fjölda sem gert er ráð fyrir á því svæði sem skipið sigldi á. Það sé með leyfi fyrir tólf farþegum, en þegar til hafnar var komið stigu margfalt fleiri frá borði. 

„Skipinu var vísað til hafnar og verklagið er þannig við þessar aðstæður er skipinu vísað til næstu hafnar sem í þessu tilfelli var Akranes,“ segir Ásgeir.

„Þá óskum við eftir því að lögregla taki á móti skipinu og telji upp úr því. En okkar fyrsta talning um borð var að þarna hafi verið rúmlega 80 manns.“ 

Hefur gerst áður

Ásgeir segir Landhelgisgæsluna áður hafa stöðvað skipið Amelíu Rose.

„Við höfum þurft að hafa afskipti af þessu skipi í einhver skipti. Það hefur gerst áður að þetta skip hefur farið út fyrir hafsvæði sitt og verið með of marga farþega miðað við það sem farþegafjöldi gefur til kynna,“ segir Ásgeir. 

Frétt af mbl.is

Fólk leiki sér ekki að því að standa í svona stríði

„Okkar hlutverk er auðvitað að sjá til þess að lögum og reglum sé framfylgt á hafsvæðinu umhverfis Ísland og í þessu tilfelli er skipið einungis með farþegaleyfi fyrir tólf og þegar að of margir farþegar eru við slík skilyrði þá er okkur að vísa skipinu til hafnar eins og þarna var gert,“ bætir hann við. 

„Nú mun þetta bara fara sinn vanagang og það á síðan bara eftir að fara í ljós hvernig það fer,“ segir Ásgeir loks. 

mbl.is/Klara

• Blogga um frétt