Þorbjörn kominn með „mun betra frystikerfi“

Kælismiðjan Frost lauk nýverið við uppsetningu og frágang á frystikerfi í bolfiksvinnslu sjávarútvegsfyrirtækisins Þorbjörns hf. í Grindavík. Nýja kerfið er mun hagkvæmari í rekstri og skapar nýja möguleika í framleiðslu og markaðssetningu, að því er fram kemur í fréttatilkynnignu.

Það var í vetur sem Þorbjörn hf. fól Frosti að hanna og setja upp nýtt frystikerfi í landvinnslu fyrirtækisins í Grindavík. Í lok mars fór Frost í þarfa- og stærðargreiningu á nýju frystikerfi og í framhaldinu var það hannað. Rafhönnun var einnig í höndum Frosts. Síðastliðið sumar var byggt nýtt hús við hlið vinnsluhúss Þorbjörns fyrir vélasal og í hann hefur frystibúnaðinum verið komið fyrir.

„Á heildina litið erum við komnir með mun betra frystikerfi en áður sem er á allan hátt auðveldara að halda við og það keyrir á mun hagkvæmari hátt en gamla kerfið,“ er haft eftur Jóhanni Vigni Gunnarssyni, sem hefur framleiðslu- og markaðsmál Þorbjörns hf. á sinni könnu.

„Áður vorum við með plötufrysta og frystiklefa. Gamla frystikerfið var sett upp á sjöunda áratug síðustu aldar og því var það komið til ára sinna. Kerfið var orðið þungt í viðhaldi og erfitt að fá í það varahluti. Nýlega keyptum við lausfrysti og bættum við kerfið en það var alveg ljóst að við þyrftum að fara í gagngerar endurbætur því það uppfyllti ekki nýjustu reglugerðir. Niðurstaðan var því sú að skipta út gamla kerfinu og setja upp nýtt. Við fengum Frostmenn í verkið og þeir unnu það hratt og vel og allar áætlanir þeirra stóðust. Við endurbættum frystiklefann, klæddum hann með yleiningum og tókum hann í gegn að innan,“ segir Jóhann Vignir.

Þorbjörn hf. hefur gert út frá Grindavík í áraraðir. mbl.is/Sigurður Bogi

Ánægður með útkomuna

„Það má í stórum dráttum segja að við höfum unnið að þessu frá vormánuðum og fram undir lok október. Frost hannaði kerfið, setti það upp, lagði og tengdi allar lagnir, þar með taldar raflagnir, og setti upp stjórntöflur. Þá voru settir upp nýir frystiblásarar auk þurrkerfis fyrir frystigeymslurnar. Verkinu er lokið og búið er að ræsa kerfið og prófa allan búnað. Gamla kerfið var keyrt á ammoníaki og það sama gildir um þetta nýja kerfi. Þetta var mjög skemmtilegt verkefni og ég tel að tekist hafi að vinna þetta hratt og örugglega. Ég er mjög ánægður með útkomuna,“ segir Bjartmar Egill Harðarson, verkefnastjóri hjá Frost.

Jóhann Vignir segir nýja kerfið uppfylla allar nýjustu reglugerðir, en það gerði gamal kerfið ekki. Þá sé gert ráð fyrir að eftirlit með kerfinu verði mun markvissara og getur Frost fylgst með virkninni allan sólarhringinn þar sem það er nettengt.

Hann segir kerfið bjóða ýmiskonar framleiðslutækifæri. „Lausfrystirinn sem við höfum tengt við nýja kerfið eykur möguleika okkar verulega í framleiðslunni. Meðal annars höfum við nú möguleika á því að frysta léttsöltuð þorskflök og einnig að lausfrysta hefðbundin flök inn á Ameríku- og Evrópumarkað. Þá getum við lausfryst þorskhrogn sem við höfum áður sent fersk frá okkur. Við höfum eingöngu verið í þorskvinnslu en með þessum breytingum horfum við til þess að geta einnig m.a. unnið ufsa, ýsu og karfa. Við erum mjög ánægðir með útkomuna og samstarfið við Frost.“

• Blogga um frétt