MAST leggur til rekstrarleyfi fyrir Arnarlax

Matvælastofnun hefur lagt fram tillögu að rekstarleyfi fyrir Arnarlax fyrir landeldi á Gileyri í Tálknafirði.

Um er að ræða heimild til ræktunar á þúsund tonnum af laxi og bleikju. Tekið er fram að um tillögu sé að ræða og að umsagnir beri að senda á MAST.

Nokkrar varúðarráðstafanir eru tilgreindar í tillögunni til að koma í veg fyrir að fiskur sleppi. Þá verði til staðar viðbragsáætlun vegna slysasleppinga og að hún sé staðsett á eldissvæðinu.

Þannig beri að tilkynna slysasleppingar til stjórnvalda sem og næstu veiðifélaga. Eins ber Arnarlaxi að halda skrá um uppruna eldislaxa sem byggir á gagnagrunni um erfðaefni hjá framleiðanda hrogna. 

Starfsmönnum kynnt viðbragðsáætlun 

„Varúðarráðstafanir til að koma í veg fyrir að fiskur sleppi vegna eldis eða flutnings á fiski skulu vera skráðar og aðgengilegar hjá eldisaðila, og áætlun um aðgerðir til að endurheimta fisk sem sleppur. Leyfishafi skal sjá til þess að viðbragðsáætlun vegna slysasleppinga sé staðsett á eldissvæðinu og kynna starfsmönnum hana. Rekstrarleyfishafi sem missir fisk úr fiskeldisstöð, skal án tafar tilkynna slíkan atburð til Fiskistofu, Matvælastofnunar, sveitafélaga og næstu veiðifélaga. Rekstrarleyfishafi ber skyldu til að halda skrá yfir uppruna eldislaxa sem byggir á gagnagrunni um erfðaefni hjá framleiðanda hrogna,“ segir í tillögunni.

• Blogga um frétt